October 27, 2025- Monday
Thawngtha: Luke 13:10-17📖📕
Sabbath Ni ah Kaung a zengmi Nu Damternak
Cozah si lomi phu pakhat nih mizaw zohkhenhnak ah ruahnak cheuhnak kong a chim. Hi ruahnak cheuhnak hna cu a tanglei bantuk an si: 1) A zawmi hna kha lungtak tein zawnruahnak he zohkhenh hna; 2) Mizaw hna i an rikhiahnak kha zulh; 3) Thazaang petu le a ṭhalei ruahnak a ngeimi siding; 4) Midang zawtnak kha tlaih hlah; 5) A zawmi hna caah thlacam; 6) Ngandamnak caah rianṭuannak in zawtnak doh; 7) Ngandamnak ṭha phunglam hna kha ralring tein zulh: rawl ṭha, pum cawlcanghnak ṭha, thli thiang, lungput ṭha, rianṭha, midang he pehtlaihnak lungtlinnak, lungput ṭha, midang caah rianṭuannak, nunnak he hawikomhnak, ziaza ṭhalo hna in luatnak; 8) A caan ahcun a zawmi hna kha a harmi biatak kha nem tein asinain fek tein chimh a herh.
Nihin thawngṭha ah, Jesuh nih Sabbath ni ah kaung a zengmi nu cu a damter. Asinain pumhnak inn hruaitu pakhat nih, Jesuh nih Sabbath ni ah a tuah tikah a phunzai. Jesuh chanlio i Farasi mi hna caah cun, mizaw zohkhenh cu rian pakhat ah ruah a si caah thihnak ṭihnung a umlo ahcun Sabbath ni ah kham a si. Hi thawngṭha ca chungah, hi nu damternak hi zohkhenhnak phunkhat a si, thihnak ṭihnung a si lo i cucaah cawlcanghnak pakhat in sualphawt a si ti kha a fiang tuk. Bawipa he ni 365 2007 –365 Days with the Lord 2007 – ah, Sabbath phungbia kha an lungthin a kau lomi in an fianternak ah, hi pa pawl nih hin zeitluk indah an lung a fimlo ti kha an hngal lo, saram sawhsawh a simi an cawtum asiloah an laa ca i rianṭuannak ah harnak an hmu lo, an hri an phoih i ti ah an chuahpi, asinain kum 8 chung Satan nih a hrenmi nu hi Jesuh nih a phoih lo ding kha an doh. Mah kha Satan nih zeitindah a tuah khawh? Bible ah Satan nih vawlei cungah huatnak he a cawlcangh khawh i fahnak a pek khawh, thlarau lei sining le a thli tein, taksa sining hmanh in a langhter a ti.
Mizaw pawl cu zohkhenhnak hlei an phu, a si lo maw? Asinain a tam deuh cu, mizaw zohkhenhtu hna nih phungning tein cawnpiaknak an pek hna lo caah a tlangpi in thlopbulnak hmanh pek awkah timhcia an si lo. Sibawite nih an tuah bantukin mizaw hna cu kan damhter khawh lo men hna lai nain kan tuah khawhmi thil ṭhabik tuah dingin rian kan ngei. Cun mizaw zohkhenh cu zangfahnak thlarau rianṭuannak pakhat a si.
Cun ni hmanungbik le kan thaw hmanungbik a phak tikah, kan dihlak in Khrih cu hmaitonh in kan i tong lai. Khrih nih kan nunnak tuanbia a kan hmuhsak lai i kan dawtmi caan vialte kha a langhter lai. Khrih nih a zungzal biaceihnak cu zeitluk in dah ahleiin mizaw hna he kan i dawt timi cungah hram a bunh lai. Mi Fapa nih mi vialte cungah a donghnak biaceihnak tuah awkah lianngannak he a rat tikah, a orhlei kam i a thimmi hna sinah, “Ka zaw i nan ka zohkhenh,” tiah a ti hna lai i a kehlei kam i sualphawtmi hna sinah, “Ka zaw i nan ka zohkhenh lo,” tiah a tilai. Dawtnak cu hman san a tlaimi a si i caan le hlawtnak (sacrifice) a hau.
Cun cucaah kan rian a tamtuk ko nain cun biakamnak tampi kan ngeih ko nain, thlarau lei siseh, pumsa lei siseh, zeibantuk zawtnak hmanh a tuarmi kan dawtmi le hawikom hna caah va len le thlacam caan kan ngeih awk a si. Khrih nih kan bia le kan thlacamnak in tawngh a duh hna. Amah lamkaltu palai (ambussador) le a dawtnak hmanrua thilri si dingin a kan hal.