Zarhpi ni 30 nak (Kum C)

Audio – 🎧👇👇👇

October 26, 2025 

Sir 35:12-14,16-18; 2Tim 4:6-8,16-18; Luke 18:9-14

Mithiang Augustine nih minung cu Pathian hmaiah  rawlhalmi (beggar) a si a ti. Mithiang Johan Damascene nih a peh rihmi cu: “Thlacamnak cu Pathian sinah thinlung le lungthin cawi asiloah Pathian sinin thilṭha hal kha a si.” Asinain Salm 130:1 nih thla kan cam tikah kan porhlawtnak le kan duhnak sangbik in maw kan chim, asiloah toidornak le ngaihchihnak lungthin “thuknak” indah kan chim tiah a ti. Toidornak cu thlacamnak hrampi a si. “Zeitindah thla kan cam awk a si ti kan hngal lo,” (Rom 8:26) ti kha toidor tein kan cohlan lawngah thlacamnak laksawng kha man loin cohlan awkah timhcia kan si. Kan thlacamnak cu Pathian hmaiah pekchanhnak nganpi a si i ngaihchihnak le toidornak lungthin in thlacamnak a si tikah amah kha sunparnak a pek.

Toidornak kong chim tikah, hi biafang a sullam taktak hngalhthiam a biapi. Toidornak taktak cu porhlawtnak le ahmaan lomi toidornak ngeih karlak ah a ummi a si. Aa toidormi Khrihfa nih cun a chambaunak kha a hngalh. Amah cu aa porhlawmi zong a silo i mah le mah aa bochan tukmi zong a si lo.

Toidornak taktak le ahmaan lomi toidornak a thleidangtu cu dinfelnak a si. Tahchunhnak ah, mi pakhat nih: ‘Hlasak thiam na si’ tiah an in ti i nangmah cu ka si tiah naa porhlawt, cucu porhlawtnak a si. Hlasak thiam na si lio ah na al ahcun, ahmaan lomi toidornak na tuah a si. Thangṭhatnak kha “Ka lawm” asiloah “Ka si khawh chungin ka tuah” tiah na leh ahcun, mah kong ah mi lungthin lak loin, na toidornak taktak kha a langhter.

Nihin i bible pahnihnak (2Tim 4:6-8, 16-18) ah St. Paul i toidornak taktak tahchunhnak zong kan hmuh khawh. Mithiang Paul nih midang nakin khrihfa ka si tiah aa porhlaw bal lo. Midang nakin ka tuah khawh deuh tiah aa porhlaw bal lo. Zeicahtiah a tuahmi rian cu amah rian a si lo, amah thawngin Thiang Thlarau ṭhawnnak nih a langtermi Pathian rian tu a si deuh. Paul nih aa porhlaw lo nain biatak kha a al lo. Paul nih misual kong a chim tikah, Jesuh Khrih a hngalh hlan i a nunning ruangah amah le amah kha misual lakah a chiabik tiah aa hmuh (1Tim 1:15-16). Phung a chim tikah, amah le amah siloin a thoṭhanmi Khrih kha a sunparter.

Nihin thawngṭha cacang zong nih toidornak kong a chim. Farasipa le ngunkhuai khawltu bianabia ah kan theih dih bantukin, Farasipa nih cun amah le amah kha miding ah aa ruat, midang kha nautat in a hmuh hna. Cutin a si cu, mah lio caan ah Farasi mi hna cu Nawlbia tlaihin “a dingmi” in an rak i hmuh hna caah a si. Cucaah, anmah le anmah kha zumhnak nganpi an rak ngei. Farasipa cu Pathian hmaiah a dir, amah le amah aa porhlaw i midang bantuk ka si lo caah tiin Pathian sinah lawmhnak bia a chim. Rawl ulh in le a hmuhmi cheuhra cheukhat pek in Pathian le Biakinn caah a biakamnak a tlinter ning kong kha aa porhlaw. Cu lio caan ahcun Farasi mi hna cu Monday le Thursday fatin rawl le ti an i sum. Hi Farasipa cungah kan tuah khawhmi a dang ahmaanmi soiselnak hna cu; aa porhlaw; aa ruamkai; mi a nautat; amah i palhnak le sualnak kha aa hngalh lo; biaceihnak zong a ngei, cucu kan tuah awk a simi thil ṭhalo tuahnak le mawhchiat lawng si loin; midang zong kha an lungthin chung i a ummi hngalh bantukin i umter in sual a phawt hna i cucu kan tuah bal awk a si lo.

Lamhlatpi in ngunkhuai khawltu pa cu misual ka si caah tiin Pathian zaangfahnak hal in thla a cam. A nunnak ruangah ningzak in vanlei hmanh a zoh ngam lo. A ṭang  lawng aa cuum, cucu “mea culpa-ka palh” timi hmelchunhnak a si.

Sihmanhsehlaw hi pahnih hna lakah ahodah kan zulh awk a si, Farasipa maw ngunkhuai khawltu dah? Farasipa he cun nawlbia zulhning kan cawn. Zeitindah fir loding le Sabbath ni thiang tein ulh ding a kan chimh. Rawl ulh le raithawinak le thlacam ning a kan chimh. Hihna lei ahhin zohchunh awktlak taktak a si. Asinain aa porhlaw i aa uah.

Khatlei kam in ngunkhuai khawltu kha kan zohchunh awk ah kan ser kho lo, zeicahtiah tangka a fir. Amah cu a dingfel lo, vawlhpamh a hmang i Pathian nawlbia a zul lo a si nain Pathian hmai ah toidor tein a um i cucu Pathian a lawmhter. Cucaah hi kong he pehtlaiin Farasipa kha tling tein kan mawhchiat kho lo i ngunkhuai khawltu kha tling tein kan zulh kho lo. Hi pahnih ahhin ṭhatnak a um i an pahnih zong misual an si ve. A ṭhami kha lak hna usih law a chiami kha philh hna u sih.

Khrihfa kan si bantukin Jesuh nih amah le amah aa toidor bantukin kanmah le kanmah i toidor dingin kawh kan si. Jesuh i toidornak cu zeitluk indah a lianngan!”…Minung muisam in a lang i mi toiah aa dor i vailamtahnak cung thihnak hmanh thih tiangin nawlngaihnak ah a cang,” (Phil 2:8).

Nunnak ah mi nih toidornak an ngeih lonak hmun hna kha tahchunhnak in kan chimh hna lai. Pakhatnak ah, ngakchia le tleirawl hna in thawk hna u sih. Sianginn ah zeitluk indah an fim tiah an i porhlawt? Mi tampi cu an fimcawnnak hlawhtlinnak an i porhlawt caah ngakchia dang le mino pawl kha an niamter hna, cu nih cun anmah le anmah an i zumhnak a hrawh. Pahnihnak ah, midang nakin ka thiam deuh tiah aa porhlawmi rawlchuantu hna kan ngei. Rawlchuan thiam taktakmi cheukhat an um ti cu al khawh a si lo nain, mi vialte cu rawlchuan thiambik an si kho lo! Na hmuh khawh bantukin toidornak cu rawldawr hmanh ah tuah khawh a si. Pathumnak ah, thlakhat ah suimilam tampi biaknak (duhpatnak) an tuah caah midang nakin ka thiang deuh tiah aa porhlawmi an um asiloah rosary tampi ka cam i Missa ka kai tiah an ti. Hi Pathian biaknak hna hi thangṭhat awk tlak an si ko nain, an i porhlawtnak thawngin, kapkhat lei in cun Farasi mi he aa dang lo.

Hi hna hi nifatin kan nunnak ah toidornak ziaza kan ngeihlonak tahchunhnak tlawmpal lawng an si. Midang vialte cungah kanmah le kanmah kan i chiahnak thawngin, Bawipa i biaceihnak kha kanmah le kanmah kan i auh. A donghnak ah cun a hmanungbik ah kan i tel ve te lai. Nifatin kan nunnak ah toidornak ngeih in midang thangṭhat le thazaang pek hi a ṭha deuh. Cu tikah Bawipa Pathian nih kan toidornak taktak ruangah a kan cawisang lai.

A thiang Missa Raithawinak kan pehzulh tikah, Pathian mithmuh ah kan i lawm zungzal khawh nakhnga le toidornak taktak a kan cawnpiak nakhnga Thiang Thlarau kha hal hna u sih.