Saturday October 25, 2025
Audio 🎧🎧👇👇
Thawngṭha 👉Luke 13:1-9
Sual ngaihchihnak ah auhnak
Nihin thawngṭha ah Bawipa nih hi ṭihnung bia hi a chim: “Nan i ngaihchih lo ahcun nan dihlak in anmah bantuk tein nan thi ve lai,” (vv. 3, 5). Ngaihchihnak timi cu zeidah a si? Biakam Hlun ah ngaihchihnak timi biafang asiloah aa pehtlaimi biafang hna cu voi thongkhat le sawmnga nak tam a lang. A tlangpi in “i mer” asiloah “kir ṭhan” tiah leh a si asiloah theological lei in “ṭhatlonak hrial in a ṭhami Pathian sinah kir ṭhan” tiah leh a si. Hi hna hi sual ngaihchihnak caah a herhmi thil pahnih an si. Tahchunhnak ah, voi thum tiang Ezekiel nih Israel mi hna sin i Pathian auhnak kha a telh: “Nan sualnak kha i ngaichih u, nan siasal kha hlaw u law nan thil fihnung vialte kha hlaw u,” (14:6); “Nan sualnak kha i ngaichih u law nan sualnak vialte kha mertak hna u,” (18:30); “I mer u, nan lam ṭhalo kha mertak cang u,” (33:11).
Biakam Thar ah, a tlangpi in hmanmi verb cu metanoeoµ a si i voi sawmthum a lang i metanoia timi min zong voi kul a lang ve. A sullam aa khatmi metamelomai kha voikhat cu “ngaihchihnak” (Maṭ 21:32) tiah leh a si.
Sual ngaihchihnak timi cu zeidah a si timi thukpi in hngalh awkah, Bishop Socrates Villegas nih a phungchimnak cauk, Jesuh bantukin dawtnak, ah aa dawh tukmi ruahnak a ngei. Pathian dawtnak cu kan sual ngaihchihnak theipar a si lo a ti. Cu Pathian nih a kan dawt cu, kan sualnak kan i ngaihchih caah si loin, dawt a kan duh caah a si. Sual ngaihchihnak cu Pathian nih a kan dawtmi kan sinak kan tonmi theipar a si. Cucaah kan sual ngaihchihnak nih Pathian sinin dawtnak a chuahter si loin Pathian nih a kan dawtnak kan hmuhtonmi nih sual ngaihchihnak a chuahter. Pathian dawtnak kha kan hmuh hmasa i cucaah kan sualnak kha kan i ngaihchih.
Mah cu ahmaanmi a si. A ruang cu October 20, 2007 kumah RPN 9 (Radio Phillipines Network) i hrawmnak ah Inn ngeitu hna nih thongtla hlun a simi khual pahnih an ngei. An lak i pakhat cu nunchung thongthlak dingin bia an khiah, a lung aa thlengnak cu mi pakhat nih Bible chung i Jesuh cu Pontius Pilat nih thih dantatnak a pekmi kong kha a relpiak hnuah aa thawk tiah a chim. Jesuh cu sualnak zeihmanh a tuah lo nain, thih dantat a si lio ah amah cu nunchung thongthlak a si tiah amah le amah aa ti. Biakinn ah amah le amah aa hmuh i vailam cungah aa thlaimi Jesuh kha a zoh. A hmaiah daihnak le dawtnak dah tilo cun zei phunzainak hmanh chim loin a ummi kha a hmuh. Cun cu caan thawk cun Pathian dawtnak le ngaihthiamnak a hmuh caah a lungthlennak cu aa thawk.
Bishop Villegas nih a peh rihmi cu Pathian nih kan tuahmi sualnak ruangah dan a kan tat lo nain, kan sualnak ruangah dantat kan si deuh tiah a ti. Thil pakhatkhat kan tuah sual tikah, cu sualnak cu kan sinah a raṭhan ko lai. Sualnak hrimhrim cu kan dantatnak ah a cang. Thil kan tuah sual tikah kan thinlung ah buainak a chuak i hnangamnak a um ti lo. Thil pakhatkhat kan tuah sual tikah ka sual tiah kan i ruah tawn. Cucu Pathian nih a chuahter lo. Cucu kan tuahmi sualnak ruangah a si. Cucaah Bawipa nih a chimmi cu, “Nan i ngaihchih lo ahcun nan dihlak in nan thi lai nain keimah ruangah nan thi lai lo, nanmah le nanmah nan i thah caah nan thi lai, keimah nih kan thah hna lai lo, nanmah le nanmah nan i kawh caah nan thi lai” tiah a ti.
Cun cucaah, dawtmi ulenau hna, hi bia hi ruatṭhan hna u sih: “Nan i ngaihchih lo ahcun, nan dihlak in anmah bantukin nan thi ve lai.”