24 October Friday

Thawngṭha – Luke 12:54-59

Caan Hmelchunhnak

Khuati thanhnak (မိုးလေဝသ ငှါန) nih kan nikhua zohnak kha chanthar fimthiamnak hmangin kan ram khuacaan kong a chimchung i a rel i thlichia, ruahsur asiloah nikhua ro le a dangdang kong he pehtlaiin tlawmpal a dikmi thawngpang a kan pek. Judah mi zong, khuacaan leiah an fim. Thli le khuadawm lawng zoh in zeitik ahdah ruah a sur lai i zeitik ahdah nikhua a lin lai ti kha an hngalh khawh. Cun zeibantuk khuacaan a si lai ti an hmuh cia caah, an fangkung le rawl kung kha an chiah hna asiloah ramdang ah an chiah hna i khualtlawnnak caah an i timhtuah.

Nihin thawngṭha ah Jesuh nih a zultu hna kha chan hmelchunhnak hna kha a dikthliar in rel dingin a ruahchan hna. Jesuh nih Pathian he remnak tuah a biapitnak kha a fiangmi tahchunhnak in a langhter. A auhnak cu a rannak in a si i Pathian vel, dawtnak le zaangfahnak cu thlennak tling caah a um. Caan dongh tiang hngah a hau lo, zeicahtiah a caan ahcun donghnak cu a tlaituk cang. Thil ṭhalo pakhatkhat kan doh i fakpi in dantat kan si ahcun, kan nunnak a donghnak ah a chia deuhmi dantatnak hrial khawhnak dingah atu ah biaceihnak zung lengah tawlrel kan i zuam lai. Zarhpi ni ah siseh, zei ni paoh ah siseh, Biakinn kan kal tikah, a kan palhtertu asiloah kan palh cangmi hna he kan i rem hmasa lai ti kha kan i zuam asiloah Missa kan i pumhnak cu santlai lo le sullam ngei lo a si lai ti bantuk a si. Hihi kan homework a si i Jesuh nih homework tuah hmasa hna seh ti a kan duh.

A donghnak ah hi ruahnak zong hi ngai hna u sih, “Khrihfa ka si” ka ti tikah. Zeicatiah hi nih hin Pathian, a velngeihnak, a dawtnak le a zangfahnak kha Pathian he remhnak ah kan herh ti kha a kan theihter. Hitihin a kal:

“Khrihfa ka si” ka ti tikah, “Khamh ka si cang” tiah ka aumi a silo. “Ka tlau! Cucaah hi lam hi ka thim” tiah ka hun ti.

“Khrihfa ka si” ka ti tikah minung porhlawtnak he ka chim lo. Pathian nih lamhruaitu a ka herh caah ka tlau ti kha ka phuan.

“Khrihfa ka si” ka ti tikah thazaang ngeih kaa zuam lo. Ka derthawm tiah ka phuan i pehzulh khawhnak thazaang hmuh awkah thla ka cam.

“Khrihfa ka si” ka ti tikah hlawhtlinnak ka i porhlawtmi a si lo. Ka hlawh a tling lo i leiba cu ka cham kho bal lai lo ti kha ka cohlan.

“Khrihfa ka si” ka ti tikah ka hngalh dih lo tiah ka ruah. Ka lunghrinhnak ah toidor tein cawnpiak ka si tiah ka hal.

“Khrihfa ka si” ka ti tikah ka tling tiah ka ti lo. Ka palhnak vialte cu a lang dih ko nain Pathian nih ka phu tiah a ka zumh

“Khrihfa ka si” ka ti tikah fahnak ka tuar rih. Lungfahnak ka ngei ve caah a min ka kawl.

“Khrihfa ka si” ka ti tikah nawlngeihnak ka ngei lo tiah biaceih ka duh lo… dawtmi ka si ti lawng ka hngalh.