Myanmar ram Kahdaihnak caah

Pope Leo nih Myanmar ram kahdaihnak, ral a tamnak ram ah daihnak um dingin nawlnak a tuah

Pope Leo XIV nih Myanmar ram ah kahdaihnak tuah dingin nawlnak a tuah i ral a chuahnak ram, abik in Ukraine le Holy Land ah daihnak a um khawhnak hnga thla a cam.

Devin Watkins nih a ṭialmi

Vawleicung Mission Zarhpi ni ah St. Peter’s Square ah Missa a dih tikah, Pope Leo XIV nih vawleicung pumpi ah daihnak a um khawhnak hnga thla a cam.

Pope nih May 2021 thawk in buainak a chuahnak Myanmar ram ah kahdaihnak tuah dingin a nawl hna, Nichuahlei Asia ram in a rami thawngpang cu “lungretheihnak” tiah a ti.

Mipi le infrastructure cungah hriamnam in i kahnak le vanlawng in bomb puahnak an tuahmi cu a ngaihchih, thahnawnnak le harnak ruangah harnak a tongmi vialte he an i naihnak kong a chim.

“A rannak in le ṭha tein kahdaihnak tuah dingin ka lungthin tak tein nawlnak ka tuah ṭhan,” tiah a chim. “Raltuknak thilri hna nih daihnak thilri hna kha aa telmi le a ṭha mi biaruahnak in lam pe ko hna seh!”

Pope Leo nih cun Holy Land, Ukraine le raltuknak nih a denmi hmun dangdang ah daihnak um seh tiah thla a cam.

“Pathian nih hruaitu vialte kha a dingmi le a hmunmi daihnak kawlnak ah hmailei ah fimnak le teimaknak pe ko hna seh,” tiah a chim.

Angelus thlacamnak hlan i a biachimnak ah, Pope nih Khrihfa hna kha Vawleicung Mission Zarhpi ni ah Khrihfabu missionary sining cohlan dingin a sawm hna. “Khrihfabu cu a dihlak in missionary a si, asinain nihin ah ahleiin Thawngṭha a hngal rih lomi hna sinah Thawngṭha phakter awkah zeizong vialte kaltak in a kaltakmi nu le pa hna caah thla kan cam,” tiah a ti. “Miphun kip lakah ruahchannak a petu missionary an si, Bawipa nih thluachuah pe ko hna seh!” a ti.