October 8, 2025 Wednesday

Audio 🎧👇

Bible – Jonah 4:1-11; Luke 11:1-4📖📖

❤️Bawipa thlacamnak 🙏❤️

Dawtmi ulenau hna, Judah mi hna cu thlacamnak ah an i pekchanhnak ruangah minthang an si. Nikhat ah voithum thlacamnak tuah ding a si caah phungning tein tuah a si. Cun rabbi pawl nih caan paoh ah thlacamnak an ngei. Rabbi pawl nih an zultu pawl kha an hman tawnmi thlacamnak sawhsawh cawnpiak zong phung a si.

Caṭialtu pakhat nih Luka Thawngṭha cu Thlacamnak Thawngṭha tiah auh a si tiah a ti, a dang Thawngṭha cauk pathum nih Jesuh cu thla a cam tiah an tive ko nain.  Mithiang Luke nih thlacamnak kha amah pumpak tuanbia ah abiapi bikmi ah a chiah. Tahchunhnak ah: Jesuh nih zaan khuadei atu le atu thlacamnak ahman lengmangmi kha kan hmuh (5:16); Zultu pahleihnih thimnak ah abiapi tukmi thlennak caan paoh ah (6:12), a muisam thlennak hlanah (11:1); Jesuh cu a Pa sinah thlacamnak in a kal. Mithiang Luke zong nih Jesuh chimmi thlacamnak kong he pehtlaiin bianabia pahnih a ṭial. Cun biakinn in chawlettu le tangka thlengtu hna ṭhawl an sinak hna i aa tinhmi cu biakinn kha thlacamnak hmun ah dirh ṭhan ding kha a si (19:46).

Rawl ei caan tlawmte lawng a um lio zongah, a rian a tam tukmi lakah thlacamnak caan a lakmi kan Bawipa zohchunhawk kha zultu hna nih an lung a suk hna. Kan Bawipa nih zaanlei a thlacamnak ah suimilam saupi a hman i a caan ahcun zaan khuadei a hman. A nunnak ah thil lianngan a cang hlan paoh ah thlacamnak ah hmuh a si. Luka Thawngṭha cauk lengah, Thawngṭha cauk hna nih,  Jesuh thlacam a kalnak hmun kha voi 80 leng an langhter. Cu nih cun Zultu pawl kha thlacam ning cawnpiak dingin hal awkah a hruai hna. Cucaah nihin thawngṭha ah, a zultu hna nih Amah cu  hitin an hal: “Bawipa, Johan nih a zultu hna a cawnpiak hna bantuk khan thlacam zong kan cawnpiak ve,” (v. 1). Kan Bawipa zohchunh awk zong kha kan lungthin chungah kan chiah awk a si. Thlacamnak caah caan kan ser maw asiloah caan kan ngeih tikah thla kan cam sawhsawh maw? Jesuh nih anmah le kannih zong nih kan theihmi le mipi zong nih an uar bikmi thlacamnak, “Bawipa thlacamnak asiloah Kan Pa thlacamnak” kha a kan pek. 

Dawtmi ulenau hna, Bawipa thlacamnak nih Pathian kong le kanmah kong zeidah a kan chimh? Pakhatnak ah, Pathian cu a sermi thil vialte sertu le ṭialtu a sinak ah Pa a si, zeizong vialte hramthawknak hmasabik le a cunglei nawlngeihnak a si i a Fapa ngeihchun he pehtlaihnak in zungzal Pa a si i, a Pa he pehtlaihnak ah Fapa pakhat lawng a si (Matthai 11:27). Pahnihnak ah, Jesuh nih Pathian cu Kan Pa tiah auh ding le a fapa le fanu sinak in kan nun khawhnak ding caah kan herhmi thil hna kha zumhnak he hal dingin a kan cawnpiak.

Bawipa thlacamnak zongah, biaknak lei unaunu (Sister) pakhat nih, hi kong he pehtlaiin lamhruainak kan hmuh: 1); Pathian kha a hmun kan pek tikah thil dang nih an hmunhma an lak khawh ti kha kan hmuh 2); Hmailei kong hngalh lomi kongah lungrethei loin nikhat hnu nikhat nun 3); Ngaihthiamnak cu zeidah a si ti kan hngalh caah ngaihthiam khawhnak ṭhawnnak kan ngei 4); Pathian nih kanmah nakin harnak kan tuar khawhnak le kan thilti khawhnak kha a hngalh deuh (v 4).

A donghnak ah dawtmi ulenau hna, Kan Pa thlacamnak nih thlacam ning a kan cawnpiak ti kha philhhlah usih. Khoika ah kan um awk a simi timi hmun ah a kan hruai i pumpak herhbaunak le lungretheihnak cheukhat lawng si loin, Pathian i zawnruahnak zongah a kan hruai. Cucu nifatin kan biaknak ah aa telmi a si. Biafang sullam ruahṭhan in lungthin pek deuh in thla kan cam maw? Pathian kha, “Ka Pa” tiah auh khawhnak tinvo sung kong kha kan ruat maw?