1 October 2025 Wednesday
St. Theresa of the Child Jesus (memorial)
Bible : Neh. 2:1-8; Luke 9:57-62
Jesuh Zultu Si Dingmi hna
Oswald Chambers nih hitin a ti: “Pathian auhnak na sinah a phak tikah, kal hram thawk law ngol hlah.”
Nihin thawngṭha ah Khrih hnuzulh awkah aa pemi minung pathum kong le Khrih nih anmah pakhat cio a lehnak hna kong kan theih.
Pakhatnak pa nih “na kalnak paoh ah kan zulh lai” tiah a ti. Jesuh nih amah hnuzulh in vawleicung ah thil lianngan tuah dingin bia i kam lo dingin ralrin a pek, cu nakin, sifahnak le santlaihlonak kha i bochan dingin ralrin a pek. Jesuh nih a hal hmasa bikmi cu thilri chawva le pumpak nuamhnak in i ṭhen kha a si. “Cenghngia nih kua an ngei i vate nih bu an ngei, sihmanhsehlaw Mi Fapa cu dinhnak hmun hmanh ka ngei lo,” tiah a ti.
Pahnihnak pa kha Khrih nih ahmasabik ah a auh. Amah cu, “Ka zul,” tiah a ti. Hi pa hi a hramthawk ahcun a lung a hring ko nain, ahnuah a lung a tling. Khrih nih a kan thim i, Amah a thimtu cu kanmah kan si lo. Johan thawngṭha chungah Jesuh nih, “Nanmah nih nan ka thim lo, keimah nih kan thim hna i a hmunmi theitlai awkah kan fial hna,” (15:16) tiah a ti.
Asinain a ruang a chimmi hi zohhmanh: “Bawipa, ka pa cu ka vui hmasa lai” a ti. Hika ahhin tukforhnak pahnih kan hmuh khawh i cu tukforhnak nih cun, Khrih hnu zulhnak in a kan hnuh khawh i a kan hrialter khawh. Hi tukforhnak hna cu: 1) Kan rian ṭuanlo ding le caan dangah tuah dingin tukforhnak kan tong. 2) Chungkhar le rualchan hna cung i kan rian nih Khrih cung i kan rian kha a kan luatter lai tiah ruah awkah tukforhnak kan tong. Kan chungkhar kan zohkhenh hmasa hna lai i kan fale kan zohkhenh hna lai i ahnubik ah Khrih rianhnak (serving) kong kan ruah lai kan ti. Ngaite ti ahcun hihi ahmasabik ah a um awk a si.
A pathumnak pa nih cun, “Bawipa kan zulh ko lai, asinain inn ah ka chungle kha damten magnṭha ka ti hmasa talai,” tiah a ti. Mah cu aa tlakmi a lo; cucu Elijah nih, “Ka nu le ka pa ka hnamh hna lai,” tiah a auh tikah Elisha nih a duhmi a si i cucu a cohlan. Asinain thawngṭha rianṭuannak cu a ṭha deuh i a rianṭuannak cu profet hna nakin abiapi deuh caah hika ahhin cohlan a si lai lo.
Phundang in chim ahcun, Jesuh nih amah hnuzulh dingin a sawmnak ah lungthin pakhat lawngin lehnak a duh, cucu, zultu sinak, a rianṭuannak lawnglawng ah aa pemi nunnak, a sawhsawh le bochannak he nun a duhnak kha an si.
Kan palhnak nganbik cu Pathian he kan i pehtlaihnak kong he pehtlaiin thil sining le a ruang kan ser tikah a si. Pathian nih a kan ser i a kan dawt tikah thil sining a chiah bal lo; Jesuh Fapa nih vailamtahnak cungah kan caah a thih lio hmanhah A kan dawtnak cu rikhiahnak um loin a si. Amah hnu zulhnak ah, hnulei kirnak, i pekchanhnak, kirnak le thlennak a umlo, tiah tlangbawi pakhat nih a ti.
Dawtmi ulenau hna, Jesuh nih a zultu hna le kanmah hna kha amah kan zulh hnu ahcun kir ṭhannak lam a um tilo tiah a kan ti. Hi kong he pehtlaiin, Amah zulh dingin bia kan khiah tikah le kan fale Catholic Khrihfabu ah tipilnak kan pek hna tikah, zeibantuk hneksaknak le harnak kan ton zongah Amah hnuzulh awkah timhcia tein um kha i zuam cio hna u sih.