September 24, 2025

Audio 👇👇🎧

📕 Ezra 9:5-9; Luke 9:1-6

Pahleihnih hna rianṭuannak

Dawtmi ulenau hna, Mithiang Christopher hi na hngalh maw ti ka hngal lo. ‘Christopher’ timi min cu Latin biafang pahnih, Christo asiloah Khrih le ferre asiloah phorh timi in a rami a si. Cucaah Christopher cu “Khrih phurtu” a si. Hi lam zulh in, Fr. Jerry Orbos, SVD nih a phungchimnak ah, kan ruah khawhnak ding caah hi biahalnak hna hi a kan hal: na min cu zeidah a si lai, Moneypher? Powerpher? Problempher? Vicespher? Cun ka chap lai, asiloah Christopher?

Nihin thawngṭha ah, Jesuh nih a Lamkaltu Pahleihnih kha Mission caah a thlah hna. Thawngṭha ah ahnu deuh ah, a zultu sawmsarih le pahnih (72) zong a thlah hna. Mission an ṭuan lio ah zeidah tuah ding a si timi lamhruainak a pek hna.

A fialmi pakhat cu khualtlawnnak caah zeihmanh i ken lo ding ti a si. Keimah caah cun, hihi zulh awk a fekmi phunglam a silo tiah ka ruah. Hihi a rian hlawhtlinnak le tlamtlinnak cu kan khonmi thilri chawva cungah aa hngatlo i biakamnak, kan ngeih awk a simi tehte sinak phun le kan lungthin dihlak in Pathian kan dawt khawhnak cungah aa hngat ti kha a kan hmuhsak. A ngaingai ti ahcun, a chuah tikah, a nemmi a pum chiahnak ding caah caw rawl einak kuang a cawi; Thawngṭha a karhter tikah tilawng pakhat a cawi i thingkung hram ah a um; Ni thum chung a ruak chiahnak ding caah thlan hmanh a cawi. Jesuh nih zohchunh awk lawng a chiah lo. Rungrul nih a eimi le vutcam nih a hrawhmi le kan kawlmi thil a himter kho lomi rumnak le thilri hna ah kan himnak hmuh lo dingin fiang tein ralrinnak a kan pek. Cu nakin a rianṭuannak caah rian a ṭuanmi kannih cu Amah lawnglawng ah kan zumhnak vialte chiah dingin a kan forh. Phundang in chim ahcun, Pathian nih kan herhmi thilri lawng si loin hmailei nunnak ah thlarau lei himnak zong a kan pek lai timi Divine Providence kha i bochan. ‘Providence’ timi biafang cu Latin biafang pahnih ‘pro’ le ‘videre’ in a rami a si i a sullam cu ‘thil pakhatkhat zoh’ tinak a si. Pathian cu thil a zohtu Pa a si, Aristotle bantukin a lum lomi pathian dang a um ti hmanh a hngal lomi Pathian a si lo. Jesuh Pa cu a lummi Pathian a si. Zeiti a si hmanh ah, kan chuah lioah zeihmanh ngei loin kan chuak i kan thih tikah zeizong vialte chuh kan si lai.

Tlangbawi pakhat nih a phungchimnak ah, kan rothil nganbik cu kan ngeihmi si loin ahodah kan si timi a si tiah a ti. Fawi tein le nuam tein nunnak caah thilri khonnak cu tukforhnak fakpi a si kho. Sihmanhsehlaw Khrih nih a rumnak rocotu ah a kan ser i cucu Pathian fale a si: amah muisam keng in sermi, a thisen in tlanhmi, amah he zungzal vancung lawmhnak i hrawm dingin auh kan si. Pathian fale nih Pathian ṭhawnnak, a umnak le a bia kha anmah le anmah ah an i put. Cucaah Pathian nih Christophers si dingin a kan auh.

A Lamkaltu hleihnih hna bantukin, Jesuh nih a Pennak dirh khawhnak ding caah kal in rianṭuan dingin pakhat cio kha a kan thlah. Vancung kainak Nili ni ah Lamkaltu hna sinah a chiahmi rian, “Cucaah va kal u law miphun vialte kha ka zultu ah va ser hna u,” timi cu Lamkaltu hna le an hnuzultu hna lawng si loin Khrihfabu dihlak le tipil innak thawngin Khrihfabu chungtelmi kanmah pakhat cio sinah chiahmi rian a si. Cu bia hna cu nangmah le keimah sinah a um.

Dawtmi ulenau hna, A donghnak ah, zeicahdah hi vawlei cungah kan um timi biahalnak a phi cu: “Pathian hngalh, dawt le rianṭuan, cun cuti cun vancung ah zungzal in Amah he i lawmh” timi kan catechism kha na lungchung in na philh lai lo. Culio ahcun, Pathian cu kan lawmhnak caah lam pakhat a si. Mi tampi nih mammon nih a tuah khawh deuh ti an hmuhmi cu khuaruahhar awk a si lo.