Zarhpini 25nak (Kum C)

Sept 21, 2025

Bible: Amos 8:4-7; Psm. 113: 1-2,4-6,7-8; 1Tim 2:1-8; Luke 16:1-13

Dawtmi ulenau hna, Amah i pumpak company a hruaitu chawlettu pakhat nih rian soktu minung pathum kha bia a hal hna. Hneksaknak caah, “Paruk kha pahnih in na ṭhen ahcun zeidah a chuak lai?” tiah a hal. “Pathum,” tiah ahmasabik soktu nih a leh. A dinfeltuk caah rian pek a si lo.

“Pahnih,” tiah a pahnihnak soktu nih a leh. Cun, a dingfel lo caah le mihrut a si caah rian pek a si lo.

Hi pathumnak soktu nih, “Bawipa, nangmah le keimah karlak ah paruk kha kan ṭhen ahcun, keimah nih pali kan pek lai i pahnih ka lak lai,” tiah a leh. A fim caah rian pek a si.

Bianabia chung i a dingfel lomi inn zohkhenhtu cu a bawipa tangka kha a hloh dih tiah sual an phawt. Rian in phuah a si cang lai ti a theih tikah, a tuahmi cu a bawi he leiba a ngeimi vialte kha amah caah a auh hna i an bill kha 50% tiang a zorter hna. A zortermi zatuak hna cu, keimah pumpak ruahnak ahcun, a rianṭuannak asiloah amah pumpak hlawknak a si kho. A rian in phuah a si hnuah, an lung lawmhnak ruangah a zohkhenhtu an um lai tiah a ruah. An bawipa cu a lung a hmuituk zeicahtiah biatak a chimlo ruangah si loin a fim caah a si.

Mi pakhat cio cu Jesuh nih tahchunhnak ah a chimmi zohkhenhtu kan si i mirum pa cu Pathian amah hrimhrim a si i velngeihnak vialte le a sermi thil vialte kha kan kut ah a kan chiahpiak dih. Hi thawngṭha hi kan langhter ahcun, zohkhenhtu pakhat nih a tanglei sining hna hi bianabia hrimhrim ah hrambunh in a ngeih awk a si.

Pakhatnak, zohkhenhtu cu a fim. Ka chimcang bantukin, hi zumhawktlak lo zohkhenhtu nih rian in phuah a sicang lai ti a theih tikah, a bawi sinah leiba a ngeimi vialte kha amah caah a auh hna i an bill kha 50% tlawmternak tiang a zorter hna. A rian in phuah a si hnuah, an lung lawmhnak (gratitude) ruangah a zohkhenhtu an um lai tiah a ruah. A hmailei caah atu ah tangka a chiah caah a fim.

Nu le va tampi le fale tampi cu an chungkhar ruangah ramdang ah rian an ṭuan; cucaah an fale sianginn an kai lai i college degree an hmuh lai, innṭha an ngeih lai i inn caah thil an cawk lai ti le adang tampi hna an si. Mi tampi nih insurances (aamah khannak) hna, nunnak timhtuahnak le philhlonak hmun ah hmun tampi kan cawk.

Dawtmi una hna, Atu cu hi vawleicung thilri lei lawng siloin a cunglei ah zungzal nunnak caah invest (ရင်းနှီးမြှုပ်နှံ) nak tuah hna u sih. Jesuh nih hitin a ti: “Kan chimh hna, nan chawva kha hawikom ah i ser u, cuticun nan chawva cu a dih tikah zungzal umnak inn chungah cohlan nan si lai” (v. 9). Hi Jesuh bia hi a tanglei bantukin lehkhawh a silai tiah ka ruah: “Cun kan chimh hna, vawlei chawva in hawikom i ser u law a dih tikah zungzal inn ah an in don hna lai.” Phundang in kan chim ahcun midang caah kan ngeihmi kha i hrawm hna usih. Vawlei chawva in hawikom ser awkah rawl, hnipuan le innchung thilri tibantuk he pumsa sifakmi hna bawmhnak in zaangfahnak tuahsernak kha tuah usih. Bawmhnak a hmu cangmi hna nih an bawmchantu hna kha an philh hna lai lo. Zaangfahnak a hmumi hna cu an herh caan ah na zaangfah hna caah na hawikom ah an cang, cu bantuk cun Pathian nih a ngaihthiamnak le bawmhnak na herh tikah an zaangfah hna lai i zungzal a inn ah an cohlan hna lai.

Zohkhenhtu i a sining pahnihnak cu bochan tlak a si. Jesuh nih zumhawktlak lo sinak kha a cohlang lo. Tahchunhnak ah, Khrihfa pakhat caah lihbia a umlo, amah cu ahmaanmi a si zungzal lai. Mi cungah fahnak bia le biafak hman lo ding kan cawn ahcun, mi cungah fahnak bia asiloah biafak hman kan i zuam lai lo, thahnawnnak hman kan i zuam lai lo. Jesuh nih a chim bantukin: “Thil hmete ah zumhawktlak a simi cu thil nganpi zongah zumhawktlak a si” (v. 10).

Cun, rumnak taktak cu kan chiahmi ah siloin kan pekmi ah aa tel. Thilri ngeih cu rian nganpi a si. Bawipa nih dinfel tein le ṭuanvo ngei tein hman i amah rian le midang rian ah chiah dingin a kan ruahchan. Kannih cu Pathian sal kan si i kan ngeihmi vialte cu Amah ta an si dih. Amah nih a kan pekmi cungah a ṭhami hlawhtlinnak kan hmuh lai tiah a kan ruahchan i a kan zumh. Pathian nih pekchanhnak a duh i midang sinah a laksawng a hrawmmi hna kha zalong tein a pek hna. Mi pakhat nih nunnak cu Pathian laksawng a si tiah a ti. Nunnak caah kan tuahmi cu Pathian sinah kan pekmi laksawng a si. Rabbi phungthluk pakhat nih “Hi vawlei ah mirum nih sifak kha an bawmh hna nain sifak nih hmailei vawlei ah mirum kha an bawmh hna”  a ti.

Zohkhenhtu pakhat i a donghnak sining cu a lungthin a pek khawhnak a si. Jesuh nih kanmah a kan sawhnak ah a hmanmi biafang cu sal timi a si. Sal cu nawl a ngei lo ti cu kan theih dih bantukin a si ko. A bawipa i nawlngaihnak kha tling tein a ngai lai. Cucaah caan-cheu (part-time) sal a umlo i caan-tling (full-time) sal lawng a um.  Cu a si caah zeizong vialte nakin Pathian sinah kanmah le kanmah100% in i pe hna usih.

Jesuh nih a bianabia kha zeinihdah kan nunnak a tlaihkhip asiloah a uk timi cawnpiaknak in a donghter. Kan nunnak uktu bawi cu ahodah a si? Kan bawipa cu kan ruahnak-nunnak a ukmi, kan ruahnak a sertu le lungthin duhnak le kan nunnak ah kan i thimmi sining hna a ukmi a si. Thil phunphun nih a kan uk khawh -cuhna cu tangka asiloah thilri dawtnak, nawlngeihnak asiloah dirhmun, rumnak le minthannak dawhnak, ukkhawh lomi duhnak le zuritnak hna a hruaitu thazaang hna an si. A donghnak ah thimnak cu pahnih an um: Pathian le “mammon” an si. Mammon cu zeidah a si? Mammon nih thilri rumnak asiloah thilri ngeihnak asiloah “kan duhnak le kan duhnak uk” a duhmi zei paoh kha a chim duhmi a si. Sualnak le rithaisii sal sinak in luatnak a kan petu Bawi pakhat lawnglawng a um. Cu Bawi cu Bawi Jesuh Khrih a si.

Phundang in chim ahcun bawi pahnih rian kan ṭuan awk a silo nain Pathian kha kan nunnak ah biapibik ah chia hna u sih. Kan nunnak ah sining phunphun kan ngei i tlangbawi pakhat nih a chim bantukin kan thimnak ah uknak a um. Cucu, vawlei hlanah Pathian, midang hna hlanah nupi/pasal, rian hlanah chungkhar, nuamhnak hlanah lunglawmhnak, dinfelnak hlanah rumnak le minung hlanah thil hna an si.

Dawtmi ulenau hna, Thih hnu nunnak kongah Khrih i cawnpiaknak kha lungtak tein kan zumh ahcun, zumhawktlak le Pathian i aa hngatchanmi thil zohkhenhtu si caan a si cang.

A ngaitu nan dihlak kha Pathian nih thlua in chuah ko hna seh!  Amen.