Midang cung Biaceihnak
12 September 2025 Friday
Luke 6:39-42
Midang Biaceihnak
Hi lam in a kalmi fimnak ruahnak cheuhnak a um: “Ahohmanh nih an ngeih lomi cu an pek kho lo.” Cun tlangbawi pakhat nih a phungchimnak ah mitcaw hna caah riantuannak hmanthlak nganpi pakhat nih ngakchia pa pakhat mit aa hup i lentecelhnak ah fung hmangin khuang a tum lio a langhter tiah a chim. Hmanthlak pawng i caption nih nihin thawngtha bia a tawinak in a langhter: “Mitcaw in lentecelh cu a hmu khomi hna caah cun a hnih a suak.”
Phungthlukbia Cauk (29:18) zong nih ruahnak cheuhnak a pek: “Hmuhnak a umlo ahcun mi cu an thi!” Mitcaw lamhruaitu le mit ṭhalo (mit chung i thingtan) muisam nih zeidah a kan chimh? Mit ṭhalo kha thlop loin um ahcun, lamhruaitu mitcaw nih rawhralnak! thil pakhat lawng a chuahpi khawh. Kanmah cawnmi lawng kha midang kan cawnpiak khawh hna. Cun kanmah palhnak nih kan mit a kan cawtter ve ahcun midang kha zeitindah an palhnak tei khawh awkah kan bawmh khawh hna lai?
Cun Judah mi rabbi pawl nih mi kha hitin ralrinnak an pek hna: “A innpa kha ṭha tein a ceih ahcun Pathian nih ṭha tein bia a ceih ve lai.” Mi pakhat nih midang biaceih sual cu a fawi i biaceihnak ah thleidannak ngeih lo cu a har tiah a ti. Midang kan biaceihnak cu a tlangpi in a dik lo, zeicahtiah mi chunglei kha kan hmu kho lo asiloah ahmaanmi thil vialte kha kan hmuh khawh lo, mi cungah kanmah le kanmah kan i hngalhthiamnak le a ruang um lomi lehrulhnak nih a kan uk caah a si. Mah le mah palhnak nakin midang palhnak hmuh a fawi deuh. Jesuh nih nunnak a kan pek khawhmi vancung phunglam pakhat kha hitin a chim: “Midang na pekmi hna le midang na pehtlaihnak hna ning cun nangmah sinah a kirṭhan lai.”
Nihin thawngṭha nih hin a fimmi, a fiangmi hmuhtonnak cheukhat a ngei: mitcaw nih mitcaw dang kha a hruai kho hna lo; kanmah le kanmah remh awk thil in kan khat lio ah midang palhnak kha kan remh ngam kho lo.
Hihi Khrihfa kan dihlak caah ruahnak cheuhnak tha an si: midang thlen kan duh ahcun kanmah tein kan thawk hmasa a hau; midang kha thawngṭha chim kan duh ahcun hi thawngṭha nunphung hna hi kan tuah hmasa a hau. Hi hna hi kan tuahmi a si, kan si lonak langhternak, mi hrokhrawlnak in sualphawt kan si lonak hnga caah a si. Midang kan bawmh hna, kan cawnpiak hna i lam kan hruai hna cu anmah bawmh, lamhruai le cawnpiak ding dirhmun ah kan um caah le anmah nakin kan thiam deuh caah si loin kanmah le kanmah kan i cawnpiak hmasa caah a si.
Midang caah lamhruaitu le cawnpiaktu si kan duh ahcun, mi pakhat nih a chim bantukin, kan kalnak ding hmun caah hmuhnak fiang le lam a langhtermi map (khuaram hmanthlak) kan ngeih a hau. Kan kalnak ding hmun cu vanram a si ahcun lam pakhat lawng a um i, cu lam cu Jesuh Khrih vailamtahnak lam kha a si. Khrih vailamtahnak ah sualnak cu ngaihthiam a si i misual cu a dam, muihnak le rawhralnak nih ceunak le biatak kha hmun a pek, thihnak cu tei a si i nunnak thar a hmuh ṭhan.
Dawtmi ulenau hna, Midang kha Khrih leiah hruai kan duh hna ahcun lamhruaitu kan si tiah kanmah le kanmah i phuan sawhsawh lawngin a za lo asiloah Khrih nih lamhruaitu si dingin a kan auh hmanh a za lo. Amah bantuk si asiloah Khrih bantuk si kan i zuam a hau; amah sinin thlarau khamhnak thiamnak kha kan cawn awk a si. Amah sinin kan cawn khawhmi thil dang a um zungzal ti hngalhthiamnak ah toidornak kan ngeih a hau.