Mirum le Vancung pennak

Bible: Judg 6:11-24a, Psalm: 84, Mt 19:23-30

Jesuh nih thawngṭha cauk chungah philh khawh lomi hmanthlak tampi a hman i pakhat cu nihin thawngṭha relnak ah hmuh khawh a si, cu cu kalauk nih ṭhim kua a tannak kha a si. Jesuh chan lio bantukin ṭhim cu a hmete in aa ong i kalauk cu saram ngan taktak an si. Mirum pakhat nih vancung pennak chung luh nakin kalauk nih ṭhimkua a luh a fawi deuh ti cu, mirum pakhat nih vancung pennak chung luh cu a si kho lo tinak a si. Jesuh nih a ruahmi mirum phun cu a ngeihchiah nih a ukmi kha a si. Cu bantuk minung cu Luka thawngṭha bianabia pakhat ah khuaruahhar in a langhter, mirum mihrut bianabia tiah an auh tawn. Rumnak cu mi pakhatkhat nih pathian ah a cang tikah, Jesuh nih a thanhmi Pathian taktak kha an hngalh ti lo. An ngeihmi chawva cungah lungtlinnak an ngeih caah Pathian an herhnak kha an hngalhthiam lo i Pathian nih a pekmi pennak laksawng kha an cohlang duh lo. Pathian laksawng nunnak cu a tlingmi in kan hmuh khawh lai, cu laksawng cu kan herh ti kan hngalh lawngah a si. Tihal kan ton lo ahcun, kan ding bal lai lo. Hmun dang ah, Jesuh nih thlarau leiin sifakmi kong a chim i vancung pennak cu cu bantuk mi hna ta a si tiah a thanh. Hihi Pathian cungah kan i hngatchannak hngalhthiamnak caah kan herh caan ah Pathian hmaiah ratnak lungput a si. Jesuh nih thawngṭha relnak ah Pathian nih hi a herhmi lungput hi ramdangmi le a si kho lomi a lomi hna sin hmanh ah a ser khawh tiah a thanh. Peter nih, ‘Ahodah khamh khawh a si lai?’ tiah a hal tikah Jesuh nih, ‘minung caah cun a si kho lo; Pathian caah cun zeizong vialte hi a si kho’. Pathian hmuhning in ruahchannak a um lomi thil a um lo; Pathian nih thawngṭha rumnak a kan pek khawhnak ding caah a herhmi onnak a sertu thlarau sifahnak kha kan chungah ser awkah rian a ṭuan zungzal.