Eucharist (Bawipa Thisa)

Mithiang Ambrose, bishop nih a ṭialmi Thilthup kong cauk chungin

Eucharist (Bawipa Thisa) ah tipil a ing tharmi hna sinah

Ti chungin a thar in a chuakmi le hi thilthuam hna he aa ceumi, Pathian mithiang hna cu Khrih biakṭheng leiah an zam i: Pathian biakṭheng ah ka kal lai, ka no lio ah lawmhnak a ka petu Pathian sinah a ti. Palhnak savun hlun kha an phoih cang, an mino sinak cu mupi bantukin an tharchuah cang, cun vancung puai cu naih awkah an i zuam. An ra i, biakṭheng thiang timhtuah a si kha an hmuh tikah, “Ka hmaiah cabuai na timhtuah cang,” tiah an au. David nih hi bia hi an kaa chungah a chiah hna: Bawipa cu ka tuukhal a si i zeihmanh ka bau lai lo. Cuka ramlak ahcun a ka chiah. Ti dinnak pawngah a ka kalpi. Cun, hitihin kan rel: Zeicahtiah thihnak mui lakah ka kal hmanh ah, ṭhatlonak cu ka ṭih lai lo, zeicahtiah nangmah nih na ka umpi. Na fungthluan le na ṭhiangṭhunh nih hnangamnak an ka pek. Ka mithmuh ah a ka hremtu hna caah cabuai na timhtuah. Ka lu kha chiti in na rumter i, lunglawmhtertu na hrai cu zeitluk in dah a ṭhat.  

Pathian nih kan pupa hna cungah manna ruah a surter i, vancung in nifatin rawl in an cawm hna cu khuaruahhar ngai a si. Cucaah Cathiang nih: Minung nih vancungmi changreu an ei. Sihmanhsehlaw cu changreu a eimi hna cu thetse ram ah an thi dih. Sihmanhsehlaw nan hmuhmi rawl, vancung in a rung ṭummi nunnak changreu nih khan zungzal nunnak kha a pek hna i a eimi paoh cu an thi bal lai lo, zeicahtiah cucu Khrih pum a si.

Zeidah a ṭhabik ti kha ruat tuah u: vancungmi changreu maw, Khrih pum dah a si, cucu nunnak a petu pum taktak a si. Pakhatnak cu van in a rami manna a si, pahnihnak cu vancung ah a um. Pakhat cu vancungmi a si i pakhat cu vancung Bawipa ta a si; pakhat cu thaizing tiang chiah a si ahcun rawhralnak a tongmi a si, a dang pakhat cu rawhralnak vialte in a luat, zeicahtiah ahohmanh nih upatnak he a teh ahcun rawhralnak a ngei kho lai lo. Kan pupa hna caah lungpi in ti a luang; nangmah caah cun Khrih sinin thisen a luang. Ti nih caan zeimawzat chung an ti a halmi a tlinter; thi nih zungzal in an thianh. Judahmi cu a din i a ti a hal rih, asinain na din tikah na ti a hal kho ti lai lo. Hmelchunhnak ah a cangmi cu a tak ah a tling cang.

Na khuaruah a harmi cu thlalang a si ahcun, na khuaruah a harmi thlalang taktak cu zeitluk in dah a lianngan? Kan pupa hna chan i a cangmi thil hna cu hmailei thil a muimi thladem men an si ti a langhtermi bia hi ngai tuah u. Cathiang nih an hnu i a zulmi lungpi chungin ti an din i cu lungpi cu Khrih kha a si. Hi vialte hi kan caah hmelchunhnak ah a cang. Atu cu zeidah a ṭhadeuh ti kha na hngalh cang: ceunak cu a thlalang nakin a ṭha deuh, a taktak cu a hmelchunhnak nakin a ṭha deuh, Petu pum cu vancung in a pekmi manna nakin a ṭha deuh.

Lehnak

Kan pupa hna nih Rili Sen kha an rak tan i cucaah an dihlak in Moses hawikomhnak ah minmei le rili chungah tipil an ing: an cung i a tlungmi thil vialte cu hmelchunhnak an si.

An dihlak in khuaruahhar rawl an ei i an dihlak in aakhat mi khuaruahhar ti zong an din: an cung i a tlungmi thil vialte cu hmelchunhnak an si.