Mithiang Ambrose, bishop nih a ṭialmi Khuaruahhar kong cauk chungin

Thiang Thlarau tel loin ti nih a thianter kho lo

Na hmuhmi lawng zum hlah tiah a hlanah an in chimh cang. Hihi na chim lonak ding caah a si: Hihi mit nih a hmuh bal lomi le hna nih a theih bal lomi le minung lungthin nih a ruah bal lomi thilthup nganpi a si maw? Nifatin ka hmuh tawnmi ti kha ka hmuh; thianter loin ka kholh tawnmi hi ti nih hin thianter khawhnak ṭhawnnak a ngei taktak maw? Thiang Thlarau tel loin ti nih a thianter lo ti kha hi chungin cawng.

Tipil innak ah tehte pathum – Ti, Thi le Thlarau – cu pakhat an si ti kha na rel cang. A sullam cu hi hna lakah pakhatkhat na lak ahcun sacrament cu pek a si lo tinak a si. Khrih vailamtahnak tel loin ti cu zeidah a si? Sacramental hmual a ngei lomi thil sawhsawh lawng. Cun, ti tel loin hrinṭhannak sacrament a um lo: Mi pakhat cu Ti le Thlarau in hrinṭhan a si lo ahcun Pathian pennak chungah a lut kho lai lo. Catechumen nih cun amah zong min a thutmi Bawipa vailamtahnak kha a zumh, asinain Pa, le Fapa le Thiang Thlarau min in tipilnak a in lo ahcun sual  ngaihthiamnak asiloah thlarau velngeihnak laksawng kha a hmu kho lai lo.

Siria Naaman nih nawlbia hlun tangah voi sarih aa kholh, sihmanhsehlaw nangmah cu Trinity (thumkomh Pathian) min in tipilnak na ing. Pa na zumhnak kha na phuan – na tuahmi kha i cinken – cun Fapa le Thlarau kha na phuan. Thil cangmi hna an i zulhnak kha hmelchunhnak tuah. Hi zumhnak na phuan tikah vawlei sinah na thi, Pathian sinah na tho ṭhan, cun sualnak ah vui bantukin zungzal nunnak caah hrin ṭhan na si. Cucaah, ti cu hmual a ngei lomi a si lo ti kha zum.

Tidil pawng i a ke a zengmi pa nih mi pakhatkhat kha a hngah hna. Ngaknu thiang nih a hrinmi Bawi Jesuh a si lo ahcun ahodah a si? A rat tikah thlalang nih mi pakhat a damter timi biahalnak a si lo, asinain Biatak hrimhrim nih van le vawlei a damter lai. Amah cu a ra lai tiah an i ruahchanmi kha a si, Pa Pathian nih Tipil petu Johan sinah a chimmi cu: Van in Thlarau a rung ṭum i a cung i aa dinmi nan hmuh tikah Thiang Thlarau in tipilnak a petu cu a si. Amah cu Johan nih a chimmi kha a si: Thlarau cu van in ṭhuro bantukin a rung ṭum i a cungah aa ṭum kha ka hmuh. Tilawng chungin a thiangmi Noah nih a thlahmi ṭhuro cu hi ṭhuro muisam a si ti hmuhter le hngalhter lo ahcun zeicahdah Thlarau cu ṭhuro bantukin a rung ṭum? Cuticun hi sacrament phunkhat kha na hngalh awk a si.

Lunghrinhnak caah hmun a um rih maw? Pa nih Thawngṭha chungah fiang tein a chim: Hihi ka dawtmi ka Fapa a si, Amah cungah hin ka lung a tling; Fapa zong, a cunglei ah Thiang Thlarau nih ṭhuro muisam in aa langhter; cun ṭhuro bantukin a  rung ṭummi Thiang Thlarau zong kha a si. David zong nih fiang tein a chim: Bawipa aw cu ti cungah a thang; sunparnak Pathian nih khuari a tum; Bawipa cu ti tampi cungah a um.  Cun, Cathiang nih Gideon thlacamnak lehnak caah vancung in mei a rung ṭum ti le Elijah thla a cam tikah Pathian nih mei a thlah i raithawinak kha a kangh ti kha nan caah tehte a khan.

Mi pakhat cio an ṭhatnak kha ruat loin tlangbawi hna an rianṭuannak kha ruat. A ṭhatnak na zoh lo ahcun, Elijah a ṭhatnak na ruah bantukin Peter le Paul zong a ṭhatnak kha ruat ve; Bawipa Jesuh sinin an hmuhmi hi sacrament hi an kan pek. Hmuh khawh lomi mei nih rian a ṭuan tiah a zummi kan chungah zumhnak pek awkah hmuh khawhmi mei kha an cungah thlah a si; Cu hmuh khawhmi mei cu hmelchunhnak a rak si, kan hmuh khawh lomi mei cu kan cawnpiaknak caah a si. Cucaah tlangbawi hna thlacamnak in auh a si tikah Bawi Jesuh a um ti kha zum.  Anih nih: Pahnih pathum an i pumhnak ah kei zong ka um ve. Khrihfabu a umnak, sacrament a umnak hmun ah zeitluk in dah a dawtnak in a umnak a pek!   

Ti chungah na tla. Na chimmi Pa le Fapa le Thiang Thlarau ka zumh hna tikha philh hlah: A ngan deuhmi, a hme deuhmi le a hmebik ka zumh ti a silo. Hi na chimmi theihthiamnak nih hin Fapa le Pa zumh awk le Thiang Thlarau le Fapa zumh awkah biakamnak na tuah, hi pakhat lawng ti dah lo cun: Bawi Jesuh vailamtahnak lawnglawng kha na zumh awk a si tiah na thanh.

Lehnak

Ka hnu i a ra dingmi cu keimah nakin a ṭhawng deuh, a kedan phoih awkah kaa tlak lo. Amah nih Thiang Thlarau le mei in tipilnak an pek hna lai.

Ṭhatlonak tuah kha ngol u law a hmaanmi tuah kha cawng u, tiah Bawipa nih a ti. Amah nih cun Thiang Thlarau le mei in tipilnak an pek hna lai.

Thlacam hna u sih.

Pathian le Pa, lam a pialmi hna sinah na biatak ceunak kha na langhter  cun lam dik leiah kirter hna. Tipil innak vel a co cangmi vialte kha Khrihfa kawhnak he aa tlakmi si awkah an i zuam men lai, cun a dohtu thil vialte kha hlawt. Na fapa kan Bawipa Jesuh Khrih thawngin. Amen.

Bawipa cu thangthat hna u sih.

– Pathian cu lawm ko u sih.Mithiang Ambrose, bishop nih a ṭialmi Khuaruahhar kong cauk chungin