Fifteenth Sunday in Ordinary Time (C), July 13, 2025

Bia cu minung ah a cang, vawleimi Khrih, le a zaangfahnak nih a khamh

Mirang Holh in mgaih a duhmi caah 👇

Deut 30:10-14; Salm: 68; Kol 1:15-20; Lk 10:25-37

Khrih ah dawtmi Unau hna, nihin ah, minung ah a cangmi Bia, Cosmic Khrih le kan dihlak in a kan khamhtu zaangfahnak kong kha kan ruah ṭhan lai. Hi hna hi biaknak lei ruahnak lawng an si lo; damnak a duh tukmi vawlei ah Pathian, kanmah le kanmah kan hngalhthiamnak le tuahsernak kan auhnak a sertu a nungmi thil taktak an si.

Deuteronomy 30:10-14 in thawk hna u sih, cuka ahcun Moses nih Israelmi hna kha Pathian bia a theihter hnanak bia kan theih. Bawipa nih, “Nihin i kan pekmi nawlbia hi nan caah a hartuk fawn lo i a hlattuk fawn lo,” a ti. Hika ahhin Pathian naihnak kan hmuh. Pathian cu kan pawngte ah a um. A hlatnak bawiṭhutdan in bia a chim lo nain kan pawngah a kal, biakamnak pehtlaihnak ah a kan sawm. Hihi Pathian nih thilrit bantukin si loin dawtnak in hawikomhnak bantukin kan sinin zumhtlak sinak a duh ti kha a kan theihter. Amah hngalh khawhnak, a bia in nun khawhnak le a dawtnak thuknak hmuh khawhnak caan pek kan si.

Atu cu, Kolose 1:15-20 ah kan lungthin kan mer lai, cuka ahcun Cosmic Khrih he kan i tong. Hika ahhin, Paul nih Khrih cu hmuh khawh lomi Pathian muisam, sermi thil vialte lakah upabik le Khrihfabu lubik in a suai. Hi caang nih hin Khrih cu tuanbia ah a langmi sawhsawh a si lo ti kha a kan hngalhter. Amah cu zeizong vialte sertu le remnak sertu a si. Amah thawngin zeizong vialte ser an si. Cun vailamtahnak cung i a thisen thawngin remnak a um. Cu vawleicung remdaihnak tahfung kha ruat hmanh. Van le vawlei hrimhrim hi a dawtnak nih a tlaih hna. Ṭhennak le lungdonghnak in a khatmi vawlei ah, daihnak le remnak a kan petu Khrih thawngin ruahchannak a um ti kha kan i cinken.

A kan khamhtu i zangfahnak kong kan ruah tikah, Luka 10:25-37 ah kan i mer. Hika ah, zungzal nunnak le nawlbia nganbik kong biahalnak in Jesuh kha a hneksakmi upadi thiam pakhat he kan i tong. Jesuh nih dawh ngaiin a kan leh i Bawipa cu kan lungthin dihlak, kan thlarau dihlak, kan thazaang dihlak le kan ruahnak dihlak in dawt ding le kan innpa kha kanmah le kanmah kan i dawt bantukin dawt ding kha a kan hngalhter. Sihmanhsehlaw Phungbia cawnpiaktu pa nih cun amah le amah a hmaanmi siter a duh caah, “Ka innpa cu ahodah a si?” A lehnak ah, Jesuh nih Samaria miṭha bianabia kha a chim. Hi tuanbia nih hin caan a lonh i nawlbia a tlin tikah zaangfahnak lungthin kha a chim. Hi bianabia ahhin mipa pakhat cu an velh i a thi tiah an kaltakmi kan hmuh. Biaknak lei mifim hna aiawhtu tlangbawi le Levi mi cu khatlei kam in an kal

Asinain Judahmi nih an nautatmi phu chungin pakhat a simi Samaria mi pakhat cu a dir i zaangfahnak a langhter. Hliamhma a pumi pa kha a hmuh, zawnruahnak a ngei i thil a tuah. Jesuh nih hi tuanbia hi innpa dawtnak le zaangfahnak kan hngalhthiamnak doh awkah a hman. Cu bantuk cun va kal law va tuah ve dingin a kan fial. Buainak le ṭhencheunak a um tawnmi vawlei ah, zaangfahnak auhnak cu a biapi tukmi a si. Khrih ah a naihtermi Bia cu theological ruahnak lawng si loin tuahsernak caah auhnak a si. Nifatin kan nunnak ah zaangfahnak kha pumsa in langhter dingin sawm kan si. Kanmah buainak ah, Pathian bia kha kan naih khawh. Kan khuachung ah hliamhma a tuarmi, hrialmi le harnak a tongmi hna lakah Khrih hmuhnak in aa thawk. Kan i nuamhnak hmun lenglei zoh le kan tonmi minung paohpaoh ah minung sinak hngalh a kan herh. Zaangfahnak tuahsernak cu sifah harnak cohlan sawhsawh men a si lo. Cawlcanghnak a herh.

Samaria miṭha pa bantukin, Luka 10:33-35 chung i kehlan pathum kha kan zulh awk a si. Pakhatnak ah, kan hmuh. Kan pawngkam herhmi hna kha kan mit kan hun. Pahnihnak ah, zawnruahnak kan ngei. Midang harnak nih kan lungthin kha a kan hlen. Cun pathumnak ah, kan tuah. A herh biknak hmun ah damnak le bawmhnak ratpi awkah hmuh khawhmi thil kan tuah. Hihi Paul nih Kolose cakuat ah a chimmi vancung remdaihnak kan nunpi ning a si.

Nifatin kan nunnak ah, hi cu a herhmi innpa sin phanh, vanchiatnak a tongmi hna bawmhchanhnak caah kan caan pek, asiloah dinlonak doh bantuk a si kho men. Kan vawlei zohkhenh tinak zong a si kho, zeicahtiah pawngkam rawhralnak a tuar cuahmahmi vawlei ah, zohkhenhnak ah kan auhnak cu a rannak in a herh. St. Francis of Assisi nih fim ngaiin a chim bantukin, “Thawngṭha kha chim zungzal u, a herh ahcun bia hmang u.” Zaangfahnak in kan nunnak nih Khrih dawtnak kong tampi a chim khawh.

Hawidawt hna, Bia cu titsa ah a cangmi, Cosmic Khrih le khamhnak a petu zaangfahnak kong kan ruah tikah, hi biatak hna hi pumsa in langhter awkah kawh kan si ti kha philh hlah u sih. Kannih cu zangfahnak a hmumi sawhsawh kan si lo; vawleicung ah Pathian thlennak rian ah a cawlcangmi kan si. Hi hmun in chuak hna u sih, hmuh awk, zawnruahnak ngeih awk le tuah awk ah thazaang peknak he. Kan tonmi vialte sinah Pathian muisam a langhtermi zangfahnak um si hna u sih. Amen.

Mithiang John Chrysostom cu Luka 10: ah

“Jerusalem in Jeriko lei kalnak lam cu sualnak nih a denmi an i hngilhnak lam paohpaoh kha a si, cuka hmun cu lanhtak hlah u!”

Calcutta khuami Mithiang Teresa: nih

“Mi sifak lakah, Khrih cu lungrethei in kan i tong i kan tongh hna tikah a hma kha kan tawngh” a ti.

Pope Benedict XVI nih Colossians:

“Khrih cu arfi tampi lakah arfi pakhat a si lo—Amah cu sermi thil vialte a ceutertu ni a si.” (Homily, 2006)