A kan cutu rul kan i theihcio hna maw?
Dawtmi u le nau nan dihlak cungah Pathian Thluachuah um ko seh.
Avoi (1) nak, – Numbers 21:4-9
Thawngthabia – John8:21-30
Nihin kan theih kan rel hnga dingmi cathing hna chungin thlarau leiin ruatṭi hna u sih.
Bawipa cu zeizong vialte a kan pe tu (giver) le kan sualnak a kan ngaithaimtu (forgiver) a si.
Kannih minung a simi hna belte cu a hal lawng a hal thiam i kan hmuh (get) tikah (forget) philh a hmangmi kan si tawn.
Bawipa nih Israelmi hna sal taannak Izipt ram in a chuah hna i Khuaiti le cawhnuk in a luangmi ram Canaan ram lei a hruai lio hna zongah, thet-se ramah Israelmi hna nih Bawipa cungah hneksaknak le a sal Moses cungah mawhchiatnat tampi an rak tuah.
Ei awk an ngeih ti lo caan ah Bawipa nih vancung in changreu (rawl) a rak pek hna. Sihmahsehlaw, mi hna nih changreu lawng an ei tikah a dang phunkhat an duh ṭhan. Bawipa nih sa zong a rak pek hna.
Khual an tlawn lio ah an ti a hal tikah Bawipa nih Lungpi chungin ti a chuahter i an ti hal a riam ter hna. Sihmahsehlaw, minung hna nih Bawipa le a sal moses cungah mawhchiatnak le sualphawtnak lawng tein an rak zaihnawh hna. Cu tikah, Bawipa nih an lakah meirul kha a rak thlah i cu rul nih cun a cuk hna i Israelmi tampi cu an thi, tiah avoi (1) Bible relnak chungah kan hmuh.
Israelmi hna nih kan sual cang ti an i theih tikah Moses sinah an ra i Pathian sinah thla kan campiak ko tiah an nawl ṭhan. Cu tikah Bawipa nih a chim bangin Moses nih dar-rul pakhat kha a ser i tung cungah a tarmi a zohmi paoh nih damnak an hmuh ṭhan.
Hi konglam hi ruatṭi hna u sih. Tuchan ah zeibantuk rul nih dah a kan cuk cio tawn. A kan cutu rul kan i thei cio hna maw? Tahchunhnak ah rul bantuk a simi micung uk duhtuknak lungput te hna, uk khawhnak nawl ngeih duhtuk te hna, mi chiatnak kong lawng chim le ceih te hna, zu din loin umkhawh lo te hna, kuak zuk loin umkhawh lo te hna, hibantuk ṭhatlonak rul nih a kan cuk cio ti hi i thei hna u sih.
Jn 8:21 chungah Bawipa nih a chim bangin “Nannih cu nan sualnak chungah nan thi lai” tiah a ti bangin a kan cutu rul hi zeibantuk rul hna dah an si ti kan i theih lo ahcun, Dar rul a zoh lomi Israelmi tampi an thih bangin kan sualnak chungah kan thi ve sual hna lai. A kan cutu rul kan i theih a si ahcun Moses tarmi Dar rul a zohmi paoh nih damnak an hmuh ṭhan bangin, Bawipa kha zoh hna u sih. Pathian a kan cawnpiakmi thil lei le a Bia leiah kan mit hoih hna u sih. Kan zoh ahcun Thlarau damnak kan hmuhṭhan ko hna lai.
Rul cuknak hma he Dar rul a zohmi paoh nih damnak an hmuhṭhan bangin, kan sualnak kan palhnak i theih in sual ngaihchihnak tuah, sualthlahnak tuah in Pathian sin kan kir ṭhan a si ahcun kan Thlarau cu a dam ṭhan ko lai. Bawipa le a vailamtung kha zoh hna u sih.
A dammi Thlarau ngeih khawh i zuam cio zungzal hna u sih.