Bawipa Caah Suimilam 24 Caan Hmannak Jubilee
Kan nu asimi Catholic Bupi nih Khrih Chuahcam 2025 Jubilee cu kan hnu kum (24th December 2024) ah Pope Francis (tlei cia) nih Rome khualipi i a ummi Mithiang Peter Biakinnpi Innka Thiang hun/onnak in hram thawh asi. Hi Jubilee kum cu 6th January 2026 ah khar/ donghter asi lai. Jesuh Khrih cu kan mah minung khamh awk ah minung cannak a laak i a nu Bawinu Mary nih a hrinnak kum 2025 tlinkan Jubilee cu vawlei cung khua zakip um Catholic (RC) vialte nih a phuphu le a dotdot in tuah asi i, siangbawi hna caah, religious hna caah, mino hna caah tibantuk in kumkhat chung pumpaluk Jubilee puai tuah awk ah rikhiah le hminchinh asi. Kan hnu zarh cu “Bawipa Thi le Sa puai, the Body and Blood of Christ.” Puai asi bantukin cu ni ah (Jubilee of 24 hours of the Lord) ti mi Bawipa caah suimilam 24 caan hmannak Jubilee kan tuah.
Zinglei 9:30 am ah Hakha khualipi chung um biakinn pali chungtel Catholic Khrihfa hna cu St.Joseph Cathedral Biakinn ah i fonh dih in kan i pum i, pumh thawh hlan ah Re.Fr.Paulinus Ghung Khui Shing nih vawlei cung hmun tampi ah Bawipa Thisa chungin khuaruahhar langhnak a umnak kong a chim. Suimilam pahra in pumhnak thawk asi i hi ni Jubilee ah siangbawi hleihnih nih Missa Raithawinak ah an i tel. Missa Raithawinak cu Rev.Fr.Dominic Kung Ṭial nih a hruai i Rev.Fr.Lucas Ṭha Ling Sum nih phung a chim. Pumh a dih in siangbawi, sisters, brothers hna le saya hna cu Rev.Fr.Julian Sang i tlangtlaknak le hruainak in Cherry Restaurant ah chuncaw an ei. Khrihfa hna cu mino hna le ṭuanvo neitu siangbawi i tawlrelnak in sathluak fun khat cio pek an si. St.Joseph Cathedral i hmunṭhu Siangbawi Rev.Fr.Jerome Hlawn Khawl cu American ram (chikkhat) a tlawn lio a si caah amah a umlo chung caankarlak cu Rev.Fr.Julian Sang nih ṭuanvo a lak chung.