Pathian he chuncaw eiṭi

Tarnu le Ngakchiapa

You tube 👇👇👇

Hngakchia pate cu Pathian hmuh le tawn a duhtuk caah a thil zuunhnih le changreu tlawmpal a zaal chungah a khumh i khual tlawn aa thawh. Saunawn a hun kal ahkhin a baṭuk caah lamkam a ummi pangpar dum pakhat ah a ṭhu i changreu aa phorhmi kha a chuah i ei aa tim. Culio i a pawngkam i pawṭam le ngeihchia ngaiin a ṭhu ve mi tarnu a hei hmuh caah a changreu cu tlawmpal a cheuh bang. Tarnu nih cun hngakchia pate cu mirh buin a hun zoh i lunglawm le thanuam ngaiin changreu cu a lak. A mirhmi Tarnu mithmai cu zoh aa dawhtuk caah hngakchia pate nih zoh lengmang khi a duh. Caan tlawmpal ah a dang tlawmpal a cheuh ṭhan. Cuti a cheu an ei pah bu khin an i zoh veve i lunghmuih tak in an mirh ṭi. Hngakchia pate cu aa lawmtuk i chun nitlak zeibia kaakhat hmanh an chim lo nain changreu an ei pah khin an pahnih cun an mirh ṭhan.

Khua a muih deng cang caah hngakchia pate cu a tho i innlei kir dingah kar a hun hlan. Karnga hrawng a hun kal ahkhin a hnulei a hur kirṭhan i tarnu cu a kuh. Tarnu zong nih cun dawhtak in a mirh ve i hngakchia pate cu a biang ah a hnamh. Inn a phak i kutka a vun awn bak in a nu nih a fapa mithmai a panhning le aa nuamhning a hmuh tikah a khuaruah a har ngai i “Zei ko nih dah mah tluk in na lung an hmuih i an lawmh ter” tiah a hal. A fapate nih cun “Ka nu, Pathian he chuncaw kan ei ṭṭi” tiah a leh. A nu nih bia hal chap aa timh lioah a fapa nih a timi cu “Ka hmuh mi vialte lakah a mirh ah aa dawhbik bak a si” a ti. 

Culio ahcun tarnute zong cu, inn ah lunghmuih ngaiin a rak ṭin ve i a fapa nih a nu lungnuam le hnangamtuk in a ṭin a hmuh cu a khuaruahhartuk ve i “Ka nu zei ko nih dah mah tluk in na lung an lawmhter” tiah a hal. A nu nih “Ka fa, Pathian he pangpar dum ah chuncaw kan i hrawm. Ka ruahnak leng in Pathian hi a rak hngakchia ngai” tiah a leh. 

Mi tamnawn nih hin tawngh, mirh, biathlum bianem chimmi biaṭha tein ngaih piak, mi ṭhatnak kaakhat chim le mi cungah zawnruahnak va langhter hna i a ṭhawnnak nih khin midang nunnak a thlen khawh hi kan philh ṭheu tawn. Kan hngalh awk a simi cu Pathian hi zeibantuk muisam a ken hngalh khawh a si lo. Aho minung paohpaoh kan nunnak ah kan hmuh kan tonmi hna hi a ruang a um peng. Pathian muisam kengmi an si ti ruahnak he chawnhbiak dih hna ding an si. Nangmah an in chawnh biaknak le an in zohnak in na chungah ummi Pathian kha hmu kho hna seh!