Khrih Nunzia Cawnnak
Khrih Nunzia Cawnnak (Thomas A Kempis)
Thomas Kempis timi min cu Latin holh in kawh auh nak min a si i a sullam cu Kempis khuami Thomas tinak a si. A tu chan ah nitlak Germany i Rhine tiva nelraw Rhineland in Dusselldorf pawng i a ummi khua hmete ah 1379 asi loah 1380 tlin kum hrawnghrang ah a chuakmi a si. A pa cu kutzung thiam John Hemakin a si. A kum 30 a si ah Netherland ram i Delvinta khua lei ah amah a upa a va phak chung cangnak khua, sianginn pakhat ah fimnak cawn dingin an rak kuat. A upa hi amah nak kumhra upa deuhmi asi. Mah khua ahcun Catholic biaknak a zumh i aa zuam ngaimi siangbawi te le Khrihfa hna i Brothers of Common life an timi biaknak lei rianṭuantu phu hna i a hrampi a simi sianginn nganpi ah a um.
Canon Regular phu ah siangbawi cannak a la cangmi a u nih Thomas kha a cung lei i phu hruaitu (uktu) kut ah a ap piak. Mah minthangmi siangbawipa (uktu) ngan he hmunhkhat ah an um i fimnak a cawn hnu ah huham (limhang) ruah khunnak cawnnak caanṭha kha a rak ngei. An phu (bu) chungtel hna i tahfung ning tein tuah zuamnak caanṭha zong a rak hmuh. Thomas i a nunnak lamthluan dihlak, a nunchungah saya hna i tahfung phunglam hna muisam serpiak nak ningin ziaza dinnak ruahkhun in a rak ṭhudir.
Amah a saya siangbawi i a hram phu cu thathawh in an ṭhancho an karhcho bantukin Canons Regular lawng siti loin a dang khuapi hna zong ah biaknak ruahkhunmi phu (bu) phunkhat cio in an rak ser chap ṭhan rih. Khi phu hna sin zong in Thomas cu fimnak a cawn pah in huham limhang ruahkhunnak an tuah mi kha zohchunh tlak ah i laaknak canṭha zong a rak hmuh rih. Asinain amah pumpakin cun a rak tel lo. Kumkul a tlin hnu ah cun ṭhatnak lei, ziaza dinnak lei kha a uar a tlaihchan tuk caah a upa siangbawipa sin ah nawl a hal i siangbawi cannak richuang luhnak nawl kha a rak hal. A upa umnak Mount St.Agnes in siangbawi phu chungah 1413 kum ah siangbawi cannak a rak lak.
Khi phu hna cu sianginn hmunthiang chung ah an i pum i dinnak zuamnak, huham ruahkkhunnak, Bible cawn(relnak) dinnak ca phawtzamhnak, Bible cahnah tlennak hna tiin biaknak lei ṭuanvo rian tampi kha an ṭuan hna. Thomas cu khi rian lawng si loin a hlei in khuachung i Khrihfa chungtel hna kha dinnak phungbia cawnpiak nak, khuate penguk siangbawi i ṭuanvo hna a simi Missa tuah phungchimnak, sual thlahpiaknak, Khrihfa hna zohkhenh kilvennak rian zong kha ṭuanvo lak in a ṭuan chap rih. Siangbawi can a duhmi hna, a note rihmi siangbawi (siangbawi a cangthar mi) hna zong kha cawnpiaktu saya ṭuanvo a lak chih rih. Sihmanhsehlaw amha nih a tlaihchan bikmi cu sianginn hmunthiang chung ah, a dai hmunking a sinak hmun ah ziaza dinnak ruahkhun in dinnak (biatak) kawl le ṭhatnak i zuamnak le a hlei in Bible ca rel(cawnnak), Bible ca thiang i biathuk hna kha cekhlat, kawl cawnnak ah lungtho tein a zuamnak kong, cuticun hmuhtonnak a tlinhmi a si caah a phungchimmi hna, cawnpiaknak hna, ca khawmh in a cawnpiaknak hna, a lung duhmi hna kha ca in khawmh i tampi a rak chuahnak kong, cuticun khi “Imitation of Christ”, (Khrih sin in cawnnak tahfung i lak in zulhphung ruahkhuannak) ca kha duhsah tein a khawmh i a rak ṭialnak kong, zeitik kum ah dah a rak ṭial ti kha dikthliar in theih a sil nain 1425 kum hrawng thawkin a kut ṭialmi ca kha a herhmi hna sin ah a rak phawtzamh hna tiah ruahdamh a sinak kong, amah kutṭial kha Brussel khua Bible cahlun chiahnak caruuk (library) ah a pek i kutṭial hran kha mah caruuk (library) ahcun hmuh khawh a sinak kong, London Khuapi chungah 1829 kum ah holh an rak teh i cun an rak phawtzamh.
Khi kutṭial hram (article) pali kha amah nih cakhawmh pakhat ah a rak tuah tiah zumh a sinain kutṭial le cakhawmh kha a min a dang tein pek arak silonak kong, amah nih cun dinnak lalm hmuhsaknak zulhphung lam hmuhsaktu ca sinak lawnglawng in a rak ṭial ṭhanmi a si i chimchinmi bia theih ṭhannak menmen in khi hna kha pakhat ah funtom mi cauk min “The Imitation of Christ” tiah an rak auh cio mi a sinak kong. A hramthawktu ahcun Thomas Kempis nih amah lungtlinnak tein a tuahkhawmhmi dinnak kutṭial (ca) ti lawng ah kan ti din a sinak kong. Amah a thih hnu ah caan a rau chan aa thleng tik i cauk in tuah si hnu ceo ah mah ca kha sunhsak in cauk ah a rak namchuah mi (upat tlak) hna nih amah kutṭial hran dal khatnak tiah ti awk asi mi catlang ah kan hmuhmi Bible ca thimhleinak kha zohchih in “of the Imitation of Christ” ti in siseh, cheu khat nih “The following of Christ” tiah a phunphun min bunh in an rak chuah cio nak in, ki bantuk cauk in pakhat tein an ṭhen i a ngaite (a dik tein) Thomas Kempis i “Khrih hmuhsakmi lam kha zulhnak cauk” tiah an rak auh cio nak in a tawinak in “The Imitation of Christ” tiah a min an rak sakmi a si.