Reflection for 11.03.2025

Mithiang Cyprian, bishop le martyr nih a tialmi Bawipa thlacamnak kong cauk chungin

Amah nih nunnak a kan pek: thlacam ning zong a kan cawnpiak

Dawtmi u le nau hna, Thawngtha nawlbia hna cu Pathian cawnpiaknak, ruahchannak sernak hrampi, zumhnak fehternak caah bawmtu, lungthin a cawmtu rawl ti dah lo cu zeihmanh an si lo. Annih cu a hmaanmi lam ah a kan umtertu, kan khamhnak a fekmi huhphenhnak an si. Vawlei cung zumtu hna lungthin cohlan khawhnak kha an cawnpiak hna tikah, vancung pennak ah him tein an hruai hna.

Pathian nih profet hna, a sal hna nih chim ding le a mi hna nih an ngaih ding hi tampi a duh. Fapa nih a chimmi bia cu zeitluk in dah a ngan deuh hnga. Hi hna hi atu cu a ratnak ding caah lam timhtuah dingin nawl an kan pek: amah pumpak in a ra i lam a kan hunpiak i cuka leiah a kan hruai. Hlan ahcun, thihnak muihnak chungah tinhmi ngei loin le mitcaw bantukin kan vakvai. Atu cu zangfahnak ceunak nih a kan ceuter cang, cun nunnak lam nganpi ah kan kal awk a si i Bawipa nih a kan hruai lai.

Bawipa nih khamhnak lei kan panh khawhnak hnga ruahnak cheuhnak le nawlbia tampi a kan pek. Thlacamnak phunglam hmanh a kan pek, zeitindah thla kan cam lai timi a kan cawnpiak. Nunnak a kan pek, cun a thiammi zaangfahnak he thlacam ning zong a kan cawnpiak. Fapa nih a kan cawnpiakmi bia in Pa sinah thla kan cam tikah kan bia ngaih a kan fawiter.

A hmaanmi Pathian a biami hna nih Pa kha thlarau le biatak in an biak caan a phan cang lai tiah a rak chimchung cang. Amah nih a kan pekmi thiannak thawngin Thlarau le biatak a comi kannih nih a cawnpiakmi thlacamnak thawngin biatak le thlarau in kan biak khawhnak hnga, ahlan i a rak kamhmi kha a tlinter.

Kan cungah Thiang Thlarau a thlahmi Khrih nih a kan pekmi thlacamnak nakin thlarau in thlacamnak a si deuhmi thlacamnak zeidah a um kho hnga? Biatak hrimhrim a simi Fapa hmur in chimmi thlacamnak nakin biatak chung i thlacamnak a tam deuhmi thlacamnak zeidah a um kho hnga? A kan cawnpiakmi si loin lamdang in thlacam cu hngalh lonak lawng si loin sualnak ruangah a si ti kha a zulh. Amah hrimhrim nih nawl a pek hna i, hitihin a ti: Nannih nih Pathian nawlbia kha nan hlawt micu nanmah phung zulh awkah a si.

Cucaah ka ule hna, Pathian kan bawipa nih a kan cawnpiak bangin thlacam u sih. A Fapa nih a kan pekmi bia in Pa sinah hal, a hna ah a thangmi Khrih thlacamnak theihter cu kan thlacamnak kha hawikomhnak, chungkhar thlacamnak ah ser a si. Pa nih a Fapa bia kha hngal hna seh. Kan thinlung ah a nungmi Fapa zong kan kaa ah um ve seh. Pa hmaiah misual hna caah dirkamhtu ah kan ngei; kan sual ngaihthiam kan hal tikah, a kan dirkamhtu nih a kan pekmi bia kha hmang hna usih. A kan chimhmi cu: Ka min in nan halmi paoh cu ka Pa nih an pek hna lai. Khrih min in amah thlacamnak bia nakin a ttha deuhmi thlacamnak zeidah kan tuah khawh lai?