Ash Wednesday

Pope Francis: Lent cu kan derthawmnak cohlan caan a si, Jesuh ah ruahchannak ngeihter ṭhan caan a si

Vatican khuapi, Mar 5, 2025 / 14:10 pm

Pope Francis nih Lenten khualtlawnnak nih Khrihfabu kha Jesuh Khrih ah ruahchannak nih a donghnak ah derthawmnak le nunnak tawite timi ṭihphannak kha a tei ti kha a theihter hna tiah a ti.

“Vutcam le vawlei in sermi, zawtnak, sifahnak le kanmah le kan chungkhar cungah ruahlopi in a tlung khomi harnak hna hmangin derthawmnak kan tong,” tiah pope nih Ash Wednesday caah timhtuahnak a ngeihmi phungchimnak ah a chim.

“Asinain, Lent cu kan ruahchannak thawhter ṭhan awkah sawmnak zong a si,” tiah a ti. “A thukmi thihnak chungin a tho i sualnak le thihnak vutcam chungin zungzal nunnak sunparnak ah a kan hruaitu Pathian sinah kan mit hler dingin sawm kan si.”

Pope cu Gemelli Sizung ah a sii lei thlopbulnak a pehzulh i Rome i Aventine Hill ah a ummi Santa Sabina Basilica chungah tuahmi Missa ah aa tel kho lo.

“Vutcam nih leidip kan si ti a kan theihter, asinain ruahchannak leiah a kan auhmi khualtlawnnak ah a kan hruai ve,” tiah Cardinal Angelo De Donatis nih papal cauk a rel lio ah a chim. “Jesuh cu vawlei leidip ah a rung ṭum i, a thawhṭhannak thawngin, amah he Pathian lungthin chungah a kan hnuh.”

Lent khualtlawnnak tuahnak a ruangah, Easter kha biapi ah chiah in, pope nih a phungchimnak ah Cardinal, Bishop le Benedictine le Dominican phu chung i biaknak lei unau hna phu sinah a thoṭhanmi Bawipa nih “lam donghnak ah” a kan hngak ko tiah a ti hna.

“Kan kalnak Easter ruahchannak nih Pathian ngaihthiamnak a kan zumhter,” tiah Pope nih a hlan Benedict XVI i bia a lak. “Sualnak vutcam chung i kan pil lio hmanh ah, ruahchannak nih nunnak lawmhnak cohlannak caah lam a kan onh.”

“Pathian sinah kirṭhan hna usih, kan thinlung dihlak in a sinah kirṭhan hna usih,” tiah Pope nih a chim. “Zaangfahnak in kanmah le kanmah leng tiang kal, pakhat le  pakhat kan herhmi i hrawm le a dingmi vawlei ruahchannak cawmken hna u sih.”

A phungchimnak ah, Pope nih kan minung dirhmun a derthawmnak cohlan cu “kan caah a ṭha” tiah a ti, zeicahtiah “hmaikhuh kan i hruk ko nain” ahodah kan si taktak ti le Pathian kan herhnak kha a kan theihter.

“A kan sersiam ṭhan, kanmah le kanmah kan i porhlawtnak a fahning a zorter, thil umtuning taktak ah a kan kirter ṭhan, cun pakhat le pakhat aa toidor deuhmi le a kan onh deuhmi ah a kan ser: Ahohmanh Pathian kan silo; kan dihlak in khualtlawnnak ah kan um,” tiah a ti.

“Hi ruahchannak he kan thinlung chungah, kan khualtlawnnak hi thawk hna u sih. Pathian he i rem cang hna u sih,” tiah Pope nih March 5 i a phungchimnak a donghnak ah a chim han.