Daily Reflection
Thlarau thazaang laknak program
(Sirah 5:1-8, Mk9:41-50)
†***†**********† https://fb.watch/x-VoAamB4E/ †***†**********†
Nihin ni caah kan rel mi Thawngtthabia cu Mark 9:41-50 a si i Jesuh hnuzulh a duh mi hna caah a herhmi zulh-phung sining hrampi a langhter kha kan hmuh khawh. “Keimah a ka zummi, hi ngakchia tete hna lak i pakhat hmanh hi, ka lam in a pialtertu cu, a hngawng ah facang rialnak lung tumpi thlaih i rili chung i thlak kha a caah a ttha deuh”, tiah Jesuh nih a ti.
Pathian rianttuan ka si timi min hmang in mah duhnak a tlinnakhnga timhnak a ngei mi, mah zawn lawng a ruat mi, Khrihfa mi hna le nuhmei ngakttah hna chawva kha mah si tthatnak caah hmuh a duhmi, mah taksa diriam nak caah midang fa le hna pum kha hman a duhmi hna cu “a hngawng ah facang rialnak lung tumpi thlaih i rili chung i thlak kha a caah a ttha deuh” tiah Jesuh nih a ti bangin hi vawlei in hloh an si kha an caah a ttha deuh. Zeicah tiah cun Pathian min hmang in satan rian a ttuan mi an si caah a si.
Cu a si caah nihin kan rel mi Thawngtthabia nih a langhter mi cu hawi a tluk lo mi hna cungah zangfahnak lungthin ngeih ding le bawmhnak pek an tinak a si. Cun Khrihfa kan sinak zong ah pakhat cio nih ralring tein Jesuh cawnpiak nak kha kan theih i kan i nunpi zungzal ding zong a si. Kan tuahsernak le kan bia hna zong ralring teim chim le um ding a herh. Abikin fawi tein lam pial khomi hna, hlen khawh a simi hna kan i ton tikah ralring tein um ding kan si zong a herh fawn.
“Na kut asiloah na ke tan” timi tahchunhnak bia hi kan nunnak ah a herh taktak mi tahchunhnak bia a si fawn. Zeicah tiah cun sualnak ah a kan hruaitu thil paohpaoh kha biatak tein hloh a herh caah a si. Hi cawnpiak nak nih a langhter mi cu pumpak raithawinak, i sumnak nganpi Khrihfa kan sinak ah a herh timi zong a si. Cun kan tuahsernak lawng si loin kan ziaza zong in midang cungah thil tampi a chuahter khawh. Kan i ralrin ding a si.
Cu a si caah, kan ruahnak, kan tuahsernak, kan ziaza hna kha felfai tein i check zungzal ding kan si. Khrihfa nun zia cu mah duhnak tuah kha si loin Pathian duhnak zulh le zumh a si caah, vailam he aa lomi harsatnak tete he kan nung zungzal ko lai. Mah duhnak i sum khawhnak ding caah thluachuah vialte chuahnak hrampi a si mi Pathian sinah mah le mah i tei khawhnak thazang hal zungzal ding a si.