February 22 Reflection
(1Peter 5:1-4, Mt 16:13-19)
Nihin avokhatnak cathiang kan relmi cu, mithiang Peter nih Khrihfa hruaitu hna kha cawnpiaknak le ralrinnak a peknak hna kong kan theih. Hi cathiang chungah “Khrihfa upa” hmanmi biafang cu, Khrih nih nawlgeihnak le ṭuanvo a pekmi hna tuukha asi mi Bishop, tlangbawi (siangbawi), pastor hna tiah kan ti khawh. Hi lio chan ah lamkaltu hna le anmah chimmi thawngṭha a zummi hna chungin Khrihfa hruaitu (tu chan ahcun siangbawi) ṭuanvo a ngeitu kha an si ko. Mithiang Peter cu a hmasabik Pope (the first Pope) asi bantukin, a unau asi mi lamkaltu hna le zumtu Khrihfa hna kha cawnpiaknak nawl (teaching authority) a ngei. Cucaah mithiang Peter nih a kan cawnpiakmi hi nihin kan chan ah ruah awk ngaingai le zulh awk a herhmi asi.
21 kumzabu i a nungmi kan chan ah Khrihfabu ah zeibantuk derthawmnak, tlukrilhnak dah kan ton ti mi zong ruah a herh cang. Khrih nih a dirhmi a Bupi cu zeibantuk zulhphung in dah kan i hruai i kan hruaitu hna zong Khrih cawnpiaknak he aa hlaat maw aa nai dah ti zong cuanh thiam kan herh cang. Khrih a Bupi asi mi Catholic kan i hruainak ah Thiang Thlarau lam hruainak cu cat lo le dong loin a kan umpi hrimhrim ti cu al awk a ṭha lo. Kan tuukhal hna cu minung an si bantukin tlamtlin lonak le derthawmnak tampi an ngei ve ko. Sihmanhsehlaw, an thadernak le an santlaihlonak kha Khrih nih ṭhawnnak in a thuamh hna i, huatu le ralchantu rel cawk lo ral phunzakip lak ah Catholic Bupi cu a tlangbawi hna hmang in a hruai zungzal ko.
Kan tuukhal hna nih hrial awk le i ralrin awk a herhmi, tangka duhtuknak, nawlngeihnak kha luantuk in hmannak, thathu ngai in an mission rianṭuannak ah thazaang chuah zuamlonak, mah le unau chungkhat rualchan ca lawng ah rianṭuannak hna zong a um ve kho men. Khi bantuk in minung pumsa duhnak hna zulh in Khrihfabu kha ṭha tein an hruai khawh lo tikah, mithiang Peter nih a unau asi mi lamkaltu hna le hruaitu hna kha minung mihmai zoh hin lo tin a rak chimh hrin hna bangin Bishop hna nih an mah an uknak tang ummi siangbawi hna kha chimh hrin awk le cawnpiak awk, a herh ning in tlaangtlaaknak nawl an ngei i cucu an ṭuanvo hrimhrim zong asi. Khrihfa hna lei kap in kan zoh tikah, kan tuukhal hna nih ningcang loin an um sualnak hnga lo, an caah thlacam piak le thazaang pek zong a herh ve. Tuukhal hna kha a doh in doh i, ralchanh phun in um awk asi lo.
Cucaah Khrih cu kan Tlangbawi Ngan le kan Tuukhal Ṭha asi bantukin, kan tlangbawi hna, kan tuukhal hna nih Khrih nun kha i zohchunh in an tuurun hna kha felfai tein a zohkhenhtu, a cawmhlawmtu tuukhal ṭha tampi kan ngeih khawhnak hnga thlacam piak awk ṭuanvo kan ngei ve. Minung cu ahohmanh a ding a ṭha zungzalmi kan um lo i, a sual a palh zungzal mi zong kan um lo caah ngaihthiamnak, theihthiamnak le zaangfah zawnruah nun kan herh cio. Sihmanhsehlaw, Khrihfabu, inchungkhar ah, veng le sang le khua le ram ah lutlai/ hruaitu hna caa zulh awk a herhmi zulhphung (upadi) an um bantukin, kuttang ummi, hruaimi, mipi hna caah zulh awk upadi an um ve hna.
Nihin mithiang Peter nih ralrin a kan pek bantukin vawlei thisa duhnak lawnglawng a zul i mah le sinak (identity) tiang le mizapi nih ai-awh in Khrihfabu tiang limhang a zortertu dingmi umtu ziaza hna cu cunglei hruaitu hna nih zoh sawh menmen awk asi lo. Catholic Bupi ah, pumpek in Pathian rianṭuantu hna i pumpak nuncan ziaza hi a biapi ngai ve i ṭhatnak le mi caah nun a siangmi si hna seh tiah mi nih an duh piak hna. Nun zia dawh lo in Pathian rianṭuantu nih an um sual tik ah an Khrihfabu member pawl an ngaih a chia. Zeicah tiah cun Pathian rianṭuantu hna nih an ai-awhmi le a rian thiang an ṭuanpiakmi cu Khrih kha asi i, Catholic bupi cu Khrih i a pum asi. Khrih le a Bupi cu ṭhen khawh an si lo caah, Khrih rian thiang a ṭuanmi tlangbawi, sister, brother hna le saya hna an pumpak nun zong hi Khrih le a Bupi caah a biapi ngai ve.
Kan Bishop hna, kan siangbawi, kan sister, brother hna le saya hna nih Pathian duhnak kha papek in, a rianthiang a ṭuan khotu an si khawhnak hnga thlacam piak hna usih. An derthawmnak le an thil ti khawhlo nak lawng kha a hmu thiamtu si loin, nifatin an dohmi tukforhnak ral phunzakip zong kha a hmuh thiam i zuam ve usih.