Babel Khualipi Kong

1. Nihin Missa ah kan rel hmasami Bible nih Babel Innsaang kong kan theih ciami tuanbia kha a kan hmuhsak, culio ahcun mipi nih Babel khuapi le a innsaang nganpi an sak hram an thawk. Innsaangpi cu van tiang phan sehlaw minung phun dihlak i fonhnak hmunpi siseh ti an rak i tinh. Sihmanhsehlaw, hi tinhmi nganpi cu a hlawh a tling lo. Zeiruang ah?

Zeicatiah kan chungah le pakhat le pakhat kan i pehtlaihnak ah a kan ṭhencheutu cu sualnak le a hnuzulh biapipa a si ti kha a hngalh lo caah a si.

Cun kanmah le kanmah kan i khamh kho lo.

December 2, 1984 ah, Pope St. John Paul II nih “Remdaihnak le Ngaihchihnak” timi Synodal Apostolic forhfialnak a chuah. Cu chungah cun Babel innsaang saknak ding caah, hi zuamnak kong hi a tial, “…Hmelchunhnak le lungrualnak hrampi a si dingmi sak an timh caah, cu hna cu hlan nakin an i ṭhek deuh, biachim ah an i ṭhen, anmah le anmah an i ṭhen, hnatlaknak le lungthin i khahnak an ngei kho lo.

Zeicahdah a nganmi project cu a hlawh a tling lo? Zeicahdah “inn satu hna nih pakpalawng in rian an ṭuan?” Lungrualnak i hmelchunhnak le hngatchannak ah an dirh caah an hlawh a tling lo, anmah kut lawng in tuahmi rian kha an duh i Bawipa tuahsernak kha an philh. Rianṭuannak le zatlang nunnak ah a tlarimi lei lawng kha an rak zoh, Pathian, an sertu le Bawipa ah hram an bunh khawhnak ding le an ṭhanchonak a donghnak bik tinhmi ah amah lei ah an rak hruai hna lai timi a tlarimi lei kha an rak philh.

Atu cu nihin minung i kan tonmi ngaihchiatnak cu, tuanbia caan kipah a cang tawnmi bantukin, Babel hmuhtonnak he aa lonak ah a um tiah chim khawh a si.”

Kanmah tein kan nunnak nun le kan nunnak project lim kan i zuam maw? Cutin a si ahcun kannih zong kan sung ve lai.

Sualnak chungin khamh awkah Bawipa kan herh. Cun, sualnak kaltak in a Fapa, vawlei Khamhtu Jesuh Khrih sinah kirnak thawngin lam a kan serpiak.

2. Salm 33 chungin lakmi kan lehnak Saam nih hi hmuhnak hi a pehzulh i “…Yahweh nih miphun hna khuakhannak kha a hrawh; sihmanhsehlaw Bawipa khuakhannak cu zungzal in a hmun, a lungthin ruahnak cu chankhat hnu chankhat in a hmun….” a ti.

Dawtmi ulenau hna, Pathian kan herh. Amah sinin kan i mer tikah ṭhencheunak le lungdonghnak lawngte kan hmuh. Amah lei i mer i, a Fapa Jesuh Khrih hnuzulh ding kha ATU BAK AH i thim hna u sih. Kanmah duhnak siloin Pathian timhtuahnak zulh kha i thim hna u sih.

3. Nihin Missa caah thimmi Thawngṭha cu Mithiang Mark nih a chimmi Bung 8 donghnak chungin lakmi. Peter nih Bawipa i biahalnak, “Mi nih ahodah an ka ti” tiah a leh hnuah, a zultu hna kha Jesuh nih a tuar lai, a thi lai i ni thumnak ah a thoṭhan lai tiah a cawnpiak hna.

Peter nih hi bia a theih tikah Bawipa cu a mawhchiat taktak! Cu tikah Jesuh nih “Satan, ka kal tak! Zeicahtiah Pathian lei na si lo, minung lei ah na um? (Mark 8:31-33)” tiah a ti.

Cu tikah Jesuh nih mibu cu a zultu hna he i fonh in mah le mah i hlawtnak lam kha cawnpiak awkah a auh hna:

“Ahohmanh ka zultu si a duhmi nih cun amah le amah kha hlaw sehlaw a vailamtahnak kha i put in ka hnuzulh seh. Amah nunnak khamh a duhmi cu a nunnak kha a sung lai; sihmanhsehlaw keimah ruangah le Thawngṭha ruangah a nunnak a sungmi cu a nunnak kha a khamh lai” a ti.

Hi bia hna hi nihin ah a hmaan maw? Khoika ah dah kan dir? Jesuh Khrih hnuzulh kan i thim cang ahcun, kannih zong mah le mah i hlawt awkah auh kan si ve. Lawmhnak caan hna he aa pehtlaimi sifah harnak le fahnak chungin Bawipa he kal ṭi dingin auh kan si.

Cutin tuah kan duh maw?

Jesuh Khrih cu keimah caah ahodah a si?