February 19, 2025 caah ruahnak cheuhnak
Buanchukcho tuanbia le Noah chungkhar cungah Pathian zaangfahnak a langhtermi, minung phun dihlak thawk ṭhannak nawl a petu – cu thil cangmi taktak kong lawng a si lo, miphun vialte caah Pathian khamhnak timhtuahnak kong a kan cawnpiak.
Catholic Catechism nih Noah he biakamnak kong a cawnpiakmi (CCC # 56-58) ah:
“Minung phun lungrualnak cu sualnak nih a hrawh hnuah Pathian nih minung kha a cheuchum in khamh a timh colh hna. Buanchukcho hnuah Noah he biakamnak nih “miphun” hna sinah Pathian sipuazi (khamhnak) phunglam kha, phundang in chim ahcun, “an ram ah, anmah le an holh cio, an chungkhar, an miphun ningin” tiah phuahmi hna cungah a langhter.
“Miphun tampi ah ṭhencheunak dirhmun cu vawlei cung, zatlang le biaknak he aa pehtlaimi a si. Babel bantukin amah tein lungrualnak ser a duhnak a ṭha lomi ah aa fonhmi, a tlu cangmi minung hna i porhlawtnak kha rikhiah a timh.
“Sihmanhsehlaw, sualnak ruangah, pathian tampi biaknak le miphun le a uktu hna i milem biaknak pahnih nih hin, hi caan karlak sipuazi cu pathian dang biaknak thlennak in an hrocer peng. Noah he biakamnak cu Jentail mi hna chanchung vawleicung pumpi zongah Thawngṭha phuan a si hlan tiang, a hmun peng.”
“Bible nih Jentail mi hna lakah: Abel miding, siangpahrang-tlangbawi Melchizedek – Khrih muisam – le miding Noah, Daniel, le Job mi lianngan zeimawzat a upat hna”. Cuticun Cathiang nih Noah biakamnak ningin a nungmi hna nih an phanh khawhmi thianhlimnak sangbik kha a langhter, Khrih nih “Pathian fale aa ṭhekmi hna kha hmunkhat ah a pumh hna lai” ti a hngak.
Bible hi nifatin kan rel maw asiloah Missa ah kan ngai sawhsawh men maw? Biakam Hlun chung i Pathian Biakamnak kong he pehtlaiin Khrihfabu nih a kan cawnpiakmi le a kan chimhmi, a dawtnak timhtuahnak kong le kan tuanbia kong kha hlathlai awkah caan kan lak cang maw?
Lehnak Salm ah hin David nih a mi hna hmai ah “Bawipa sinah biakamnak a tuahmi” kha tlinter dingin bia a kam. Bawipa sinah zei biakamnak dah kan tuah cang? Bawipa sin i biakamnak kan tuahmi hi kan tlinter maw?
Pathian Pennak i hmelchunhnak khuaruahhar hna kong ah, Jesuh nih mi kha a rannak in a damter tawn hna. Asinain, nihin i Missa caah St. Mark i Thawngtha chungin kan caah thimmi a tthawngmi tuanbia ah hin, Bethsaida khuami mitcaw pakhat cu a tthencheu in a damhmi kha kan hmuh.
Zeiruang ah?… Mitcaw pa i a zumhnak a ṭhanchonak ruangah a si men lai. Asiloah, hi khuaruahhar thil lianngan ah hin kan dihlak caah cawnnak a um men lai.
Mi tamdeuh cu pumsa leiin mitcaw kan si lo, asinain cheukhat cu an si. Cun taksa lei khuaruahhar thil hna cu a um taktakmi an si i a cang kho rih ko.
Asinain kan dihlak in thlarau lei mitcawmi kan si, ahleiin kan nunnak ah caan dangdang ah, Sualnak nih kan mit a kan cawtter dih.
Tipil innak Sacrament cu hlanlio Khrihfabu ah Fimthiamnak Sacrament tiah an rak auh cu a ruang tha a um. Sihmanhsehlaw, cu a nungmi zumhnak ceunak cu kan nunter peng a hau.
Catholic phunglam ah thlarau lei hngalh khawhnak tiah auhmi kong ah dawh tein ruahnak cheuhnak pum a um. Hi theihnak hna hi, lam pakhat in, kan taksa theihnak he aa tlak.
Thlacamnak le Bawipa he naihniam tein i pehtlaihnak thawngin kan lungthin chung ah Bawipa nih bia a kan chimhmi theih khawhnak hna kan ngeih khawh. A nungmi zumhnak thawngin, nifatin kan nunnak ah a cangmi thil taktak le minung taktak ah a langmi hmuh khawhnak mit kan hmuh khawh.
Nihin ah Jesuh hmuh a duh pengmi minung si dingin sawm kan si. Cu duhnak nih cun thlacamnak le hawikomhnak nunnak ah thukpiin a kan hnuh awk a si. Cuka ahcun, zumhnak nung nih a kan thawhtermi naihniam tein um khawhnak ah, Bawipa hmuh awkah kan herhmi ceunak kha kan hmuh. Cuka ahcun, Emmaus Lam i zultu hna bantukin kan mit cu a au (Luka 24:13-35 ah zoh).
Dawtmi ulenau hna Thlarau mitcawtnak damter dingin Bawipa sinah kan hal cang maw?