January 27, 2025 caah ruahnak cheuhnak
Reading 1-Heb. 9:15,24-28/ Gospel Mark 3:22-30
1. Liturgical cycle i Ordinary Time kan kal lioah Hebrew cakuat chungin kan cawnpiaknak a pehzulh. Jesuh cu Biakam Thar Remdaihtu (Mediator) a si. Amah cu Zungzal Tlangbawi Ngan a si i Levi tlangbawi hna nih an raithawinak pehzulh a hau tilo.
Biakam Thar Remdaihtu cu vawlei cung Biakinn chung i a biami hna kha ṭhen awk ah minung nih an sermi puanzar in siloin vancung ah a ummi Pa hmai hrimhrim ah a kal. Amah lungtho tein aa pekchanhnak, a raithwinak cu zungzal a hmunmi a si i tuahṭhan a hau tilo.
Atu cu Pathian hmai hrimhrim ah kan caah thla a cam!
Cun, a khamhnak rian lim awk le amah he aa pehtlaimi vialte kha amah sinah lak awkah a kir ṭhan lai. A dong bal lomi Pennak kha a dirh lai. Thihnak in a thothanmi nih cun kan dihlak in amah he a kan thawhterṭhan lai!
Cucu Hlan Khrihfabu nih Zumhnak phuannak (the Creed) ah nolh lengmang in an chim (cam) lawng siloin an zumh taktak ko.
The Creed (Zumhnak) ah kan thlacamnak hi kan zumh taktak maw?
2. Salm caṭialtu nih, hi Thangṭhatnak Hla ahhin, “Vawleicung pumpi nih Pathian khamhnak ṭhawnnak kha an hmuh cang” ti kha a kan theihter.
Cun, a thilti khawhnak cu a sermi thil ah a lang. Minung lungthin kipah ṭialmi Natural Moral Law (Kokek Nunzia Upadi) ah a lang. Bible Cathiang, Biakam Hlun le Biakam Thar ah tlamtling tein Jesuh Khrih ah langhter a si.…Asinain mi tampi nih an zum rih lo.
Cuka hmun ahcun kan lut. Vailamtahnak le Thlan Lawng (Empty Tomb) hmuhsakmi mission ah kan dihlak cu sawm kan si. Hi a herhtuk mi caan ah Khrihfabu i mission rianṭuan pehzulh dingin kan i tel.
Jesuh Khrih kan zumhnak kong hi mi kan chim hna maw? Kan Catholic zumhnak hi midang sinah fainter khawhnak tiangin kan hngalhthiam maw?