January 24 Reflection

Mk 3:13-19

 Jesuh cu tlang cungah a kai i a duhmi kha a kawh hna. Hleihnih a thim hna i annih cu Lamkaltu hleihnih tiah min a sak hna.  A thawh hna i, “ka sin i um awk ah kan thim hna, cun phungchim awk ah kan thlah hna lai i khuavang ṭhawl khawhnak ṭhawnnak nan ngei lai,” tiah a ti hna.

 Kan theihmi thawngṭha bia kan zoh tik ah, Lamkaltu hna i a pakhatnak an ṭuanvo cu Bawipa he um awkah asi. Nihin kan chanah Lamkaltu hna ai-awhtu cu a hodah an si kan ti asi ahcun Pope, Bishop hna le (or) tlangbawi (siangbawi) hna an si tiah kan ti ko lai. Khrihfa kan zapi tein Khrih hnu zultu kan si ko nain, Lamkaltu hna he aa pehtlaiin tlangbawi hna an si ko. Cu asi tikah, kan tlangbawi hna cu a pakhatnak ah Bawipa he an umṭi zungzal awk asi. Cun a pahnihnak ah tlangbawi(siangbawi), pastor hna cu phungchim (thawngṭha) an chim awk hrimhrim asi.  

Bishop, Siangbawi hna nih thawngṭha chim an zuam tilo, phungchim an duhlo ahcun cu bishop, siangbawi, pastor hna cu Bawipa he an umṭi lo tinak asi ko. Phungchim a thiam le thiam lo cu phundang asi ko. Bawipa he a umṭi mi paoh nih Khrih Jesuh le Pa Pathian dawtnak kong cu a chim le a phuan aa harh awk asi lo. Thiam zong ah thiamlo zongah thawngṭhabia (phungchim) awk ah kawh le auh an si.

Cu caah Catholic Bupi nih tlangbawi a cang hnga dingmi brother hna kha a kumkum in cawnpiaknak (training) kum saupi a peknak hna cu asi. Tlangbawi (siangbawi) cannak ordination an hmuh hlanah vawlei leiin siseh, biaknak leiin siseh, fimthiamnak tampi cawnpiak an si. Cu hna lak ahcun Philosophy (အတွေးခေါ်ပညာ), theology (biaknak le Pathian kong), doctrine (Catholic Bupi zumhnak lei kong cawnpiaknak) hna le a dangdang fimthiamnak hna le moral (umtu ziaza) hna cawnpiak an si. Tlangbawi a cang hnga dingmi hna nih hi vialte fimthiamnak an cawnnak thawngin Bawipa he an umṭi i a thawngṭhabia kha ningcang tein an chim khawhnak hnga caah asi. A pathumnak ah, Lamkaltu hna cu khuachia khuavang ṭhawl khawhnak pek an si lai tiah Bawipa nih a ti. Tlangbawi (siangbawi) hna cu Jesuh Khrih hrimhrim nih a kawhmi hna le a thimmi hna an si bantukin zumtu; mi sawhsawh nih kan ngeih khawh lomi huham ṭhawnnak (power) pek an si. Tlangbawi (siangbawi) hna lawng nih tuah piak khawh mi Missa Raithawinak, Sualthlahnak le Mizaw Sathau Thiang thuhnak Sacrament hna thawngin kan tlangbawi hna nih khuachia khuavang ṭhawl khawhnak ṭhawnnak an ngeih. Cu asi caah, Catholic Bupi ah, kan tlangbawi hna cu ahleikhun huham ṭhawnnak an ngei ti cu al khawh lomi a dik ahmaan mi asi i Jesuh Khrih hrimhrim nih pekmi asi.

Kan tlangbawi (Pope, Bishop, siangbawi) hna cu minung an si ve ko caah pumpak derthawmnak, chamhbaunak, pumpak sualnak le tlamtlinlonak tete an ngei cio ko lai, sihmanhsehlaw minung kan sining le kan derthawmnak vialte a thei dihtu Bawipa Jesuh nih, “a duhmi hna kha a kawh hna, amah he umawk caah, a thawngṭhabia kha an mah le a pahrang cio in phuan awk caah le khuachia khuavang le ṭhatlonak a phunzakip ṭhawl khawhnak ṭhawnnak,” a pek hna caah Khrihfa hna nih kan tlangbawi hna kha upat in daw hna usih.

A thianghlim mi ṭihzahnak pe hna usi law, Bawipa he a ummi, Pathian bia a cawnpiaktu, thawngṭhabia chimnak ah teima tein zuamnak a ngeitu le ṭhatlonak vialte a ṭhawl a dawi khotu an sinak hnga thlacam piak hna usih. Kan tlangbawi (Khrih i Lamkaltu) hna kha Bawipa nih thluachuah pe hna sehlaw tukforhnak phunzakip chungin khamh hram ko hna seh.