January 21 Reflection
Khrihfa kan nunnak ah dawtnak rian `ha kan `uanmi a tampi ko lai. Kanmah pumpak zong harsa ngaiin kan um ko lio ah, kanmah nakin a harsa deuhmi, bawmhchanh a herhmi hna kha kan si khawh tawk tein kan bawmhchanh caan a um cio tawn. Sihmanhsehlaw, a caancaan ahcun kan bawmhchanh mi lila nih kan dawtnak le an zawn kan ruahnak hna kha zeiah rel loin aa theihter lomi zong an um tawn ko lai. Cu chinchap ah ning hngal ngai le bo`heeng ngaiin a kanmah lehlam ralchanh i a kan huatu, kan kong thang a kan chiattu zong an um men ko lai. Khi tikah minung kan si bangin dawtnak rian`uan le mi harsa, mi sifak, zohkhenhtu ngeilo mi hna va bawmhchanh ding ah kan tha a zor `heu tawn. Khi bantuk thil kan ton tikah, kan ruah awk asi mi cu, Hebrew 6:10-20 chungah kan hmuh bantukin Pathian cu zumhtlak asi i a biakam a let bal lo, lungthin `ha he rian`ha kan `uanmi vialte hi Bawipa nih pakhatte hmanh a philhlo ti hi zumh ngam a hau.
Minung mithmai `ha hmuh duh ah rian`ha `uan si loin minung nih kan hmuhkhawh lomi vialte, minung nih a thlithup in kan tuahmi le, kan lungchung ruahnak vialte a hmu dihtu Pathian kut chungah kan tuah kan `uanmi vialte kan pekchanh dih asi ahcun minung nih zeibantuk lunghrinhnak, namnehnak le zawmhtaih thlanglamhnak kan in zongah lungnuam loin kan um lai lo. Minung hna i conglawmh thang`hatnak ah kan lung diriamnak si loin Bawipa sinin kan hmuhmi lunglawmh hnangamnak kan comi tu ah kan tha a nuam lai.
Cun nihin thawng`habia kan relmi kan zoh tikah Bawipa Jesuh le a zultu hna sabbath ni ah khual an tlawnnak le zultu hna nih an paw a `aam caah mi lochung favui kha an sih, an ei pahnak le cu kongah Farasi mi hna nih Bawipa Jesuh kha biahalnak le sualpuhnak kong kan theih. Hi kongah ruahding phunhnih a um: a pakhatnak ah Bawipa Jesuh zultu hna nih an paw`aam an i tuar khawhlo caah le chuncaw an i phawrh lo ruangah, an kut an i suum kho lo i an hmaika i ummi paoh kha an ei an din tikah, Bawipa Jesuh a huatu le a ralchantu hna caah, caan`ha i lak riangmang in Bawipa Jesuh tu kha biahalnak le mawhchiatnak a chuak. A pahnihnak ah phungbia a hartuk mi le a zungzal zulhkhawh awkah, a hartuk mi dun le dan i ser riangmang in mah nih zulh khawh huaha `ung loin mi an sualnak va kawlnak caah phung a sermi Farasi mi hna lungput asi.
Minung hmai lawngah `hatnak tuah aa zuammi, mi sualnak lawng a ngiami hna le thil sining le caan nih a pekning in khua a ruat thiam lomi hna pawngkam um cu `ihnung asi zia, kan hmuh khawh. Catholic moral teaching timi ah zeidah kan hmuh ti asiah cun “Extreme needs no law,” ti asi. Thihnak nunnak rikaa i kan um lio (အရေးပေါ်) ah cun upadi zulh a herhlo ti asi. Chim duhmi cu a caan le a hmun zohthiam i khuasak, khuakhan lairel thiam zong hi a biapi tuk ve i, zeizongte kan tuahsermi phung le lam dun le dan hna hi minung kan `hatnak caah ser an si i minung caah harnak le `hathnemnak a hrawktu, minung caah `ihnung ral a chuahpitu an si lo timi kong Bible nih a kan cawnpiak.
Marka 2:23-28 chungah, “David le a mi hna nih khan, zeihmanh eiawk an ngeihlo i an rawl a ṭam tikah khan, zeidah an tuah, ti kha nan rel bal lo maw? ” Cu changreu cu tlangbawi dah tilo nih cun ahohmanh nih ei phung a si ṭung lo. Cun pei, a mi hna hmanh kha a pek ve hna kha,” tiah a ti hna. “Cun Jesuh nih cun, “Sabbath cu minung caah pei ser a si cu, minung cu sabbath caah ser an si ṭung lo, “cucaah Mi Fapa cu sabbath Bawi zong a si,” tiah a ti.
Khrihfa kan nunnak ah, kan nun zia a `hatlo ruangah kan Bawipa Jesuh Khrih hi sualpuh le biahal a tong tawn maw? Asiloah, Farasi mi bantukin kanmah nakin a `ha a fim a thiam deuhmi hna an sualnak lawng kan kawl tawn maw? Thiang Thlarau nih lam kan hruai seh law nunzia a thiammi Khrihfa kan si khawhnak hnga Bawipa nih thluachuah kan pe seh.