Reflection for January 14
1. Hebru cakuat cu hlanlio Khrihfabu; Judah zumtu hna sinah ṭialmi theology lei in a rummi cakuat a si. Kan ṭhencheunak ah catialtu nih Jesuh kong a chim tikah, Pa Pathian nih zeizong vialte kha Jesuh Khrih nawlngeihnak tangah a chiah dih hna tiah a kan cawnpiak. Cun, Jesuh nih kanmah caah amah lungtho tein a tuar i a thi tiah a fainter. Cucaah, kan theih bantukin “A thihnak hmuhtonnak nih minung vialte kha ṭhatnak a pek hna lai”. A thihnak thawngin, Jesuh Khrih nih thihnak hrimhrim kha a tei i zumhawktlak tein amah a zulmi vialte caah Pathian dawtnak hawikomhnak tlinnak ah zungzal nunnak innka a hunpiak hna. Cun, cakuat nih a kan theihter bantukin, unau tiah a kan auh. Kannih cu Pa i fapa le fanu hna kan si, Fapa, Jesuh Khrih ah fapa le fanu hna kan si. Hihi kan zum maw? Cucu kan fian khawhnak hnga – le kan nunter khawhnak hnga – Bawipa sinah bawmhnak kan hal maw? Atu cu thawk caan a si cang!
2. David nih Pa Pathian le Vawlei Sertu nih zeizong vialte cu a ke tangah a chiahmi kong kha hla in a sak. Bible chung i, Amah ketang timi biafang nih a sullam cu Amah nawlngeihnak tangah tinak a si. Hihi Messiah i salm a si, Israel caah a ra dingmi biakammi Messiah lei kha a sawh. Khrihfa kan si bantukin, Salm Cauk kha Khrihfabu nih phungning tein nifatin thlacamnak a simi Liturgy of the Hours ah kan cam. Bishop, Tlangbawi, Deacon le biaknak lei mivialte nih thla an cam i mi sawhsawh pa le nu paohpaoh caah thazaang pek a si. Thiang Thlarau ceunak thawngin Jesuh cu Pa nih a thlahmi a si ti kha kan hngalh i zeizong vialte cu a ke tangah chiah an si cang. Thil vialte lakah! Amah cu Khamhtu le Bawi zong a si! Cu chungah nangmah le keimah kan i tel. Jesuh kha kan Bawipa si dingin kan hal cang maw? Kanmah le kanmah, kan lungretheihnak, kan hmailei, kan chungkhar, kan phaisa… vialte kha a ke tangah chiah kan i thim cang maw? Asilo ahcun, nihin cu thawkni a sicang. Jesuh ra law kan khamh ko tuah. Jesuh ra law kan Bawipa si ko tuah. Hliamhma a pu i a thawhṭhanmi na ke tangah kan i chiah.
3. Thawngṭha chimtu Mark nih nihin i Missa Raithawinak caah chiahmi Thawngṭha ah, Jesuh nih pumhnak inn ah a cawnpiak hna tikah a cawnpiaknak cu rabbi dang hna he aalo lo tiah a kan chimh. Mipi nih Nawlngeihnak he a cawnpiak hna ti kha an hngalh colh. Cucu Amah cu Minung ah aa cangmi Bia, Thluachuah Thumkomh Pathian i a Pahnihnak Minung a si caah, Minung pakhat in kan lakah a ra. A nawlngeihnak cu Pathian nawlngeihnak a si! A thawhṭhan hnu tlawmpal ah le Pa sin a kai hlan teah a zultu hna kha a rianṭuannak pehzulh dingin a thlah hna lio ah, “Vancung le vawlei cung i nawlngeihnak vialte cu pek ka si cang. Cucaah va kal u law miphun vialte kha ka zultu ah va ser hna u law Pa le Fapa le Thiang Thlarau min in tipilnak va pe hna u, kan fialmi vialte hna kha an zulhnak hnga va cawnpiak hna u; nan sinah a zungzal caan dongh tiangin ka um lai” (Matt. 28:18). Cucu hell khuachia, a thiang lomi thlarau nih a buaitermi pa kha Satan nih Bawipa Jesuh hawnnak kha a doh kho lo tinak a si. Khrihfabu cu Khrih Pum a si. Amah cu a Pum i Lu a si, nawlngeihnak cu kan sinah pek a si cang. Cucu kan zum maw?