December 26 Reflection

1. Catholic Khrihfabu ah, Christmas cu ni 8 chung (Octave, Latin in Octava) kan tuah i Christmas caan ṭha taktak ah aa hun. Christmas Octave ni hnihnak ah Khrihfabu i a lianngan mi Proto-Martyr (Martyr Hmasabik), Deacon St. Stephen kha kan philh lo.

Bawipa chuahni puai nihnihnak ah zeicahdah Martyr kan lawmh ti hngalhthiam awkah, Pope Saint John Paul II hmuhning kha ruat hna u sih.

“Khrihfabu nih martar ni cu “dies natalis” (chuah ni) tiah a ti. A ngaingai ti ahcun, Khrih thihnak le thawhṭhannak thawngin, martar thihnak cu Vancung ah hrin a si. Cucaah cun Christmas hnu nikhatnak ah martar hmasabik Stephen puai kan tuah.

“Bethlehem khua ah hrinmi Jesuh nih kan caah a nunnak a pek i zumhnak le Tipil innak thawngin ‘cunglei in’ hrinṭhan mi kannih zong nih kan unau dawtnak caah kanmah i nunnak pek ngam kan si venak hnga caah a si” (Blessed John Paul II, Angelus, Mithiang Stephen puai, 2002).

Kan rel hmasabik mi bible ah, Lamkaltu cauk chung i ṭialmi Mithiang Stephen Marta a sinak kong, mithmuhtu tuanbia chungin ṭhencheu kan ngei. A fiangtuk mi cu, Deacon St. Stephen cu a Bawipa Jesuh he aa tlaktuk caah lung in a chehmi hna hmanh a ngaihthiam hna.

2. David nih kan lehnak Salm ah a sakmi zumhnak in a khatmi zumhnak, Pathian cu lungpi a si timi cu Mithiang Stephen i tehte khannak ah a lang. Kanmah pumpak nunnak zong ah a lang chin lengmang awk a si. Kannih cu Jesuh Khrih chanthar zultu kan si i kan thlahmi nunphung nih kan i hrawm dingmi thawngpang kha a doh chin lengmang. Bawipa biakamnak kan i bochan maw? Amah cu kan lungpi ah kan ton maw?

3. Nihin Mithiang Stephen Martyrdom philhlonak caah Thawngṭha nih, a zultu hna kha Jesuh nih hremnak nan tong lai tiah a chimh hna i Thiang Thlarau nih nanmah hmangin bia a chim lai tiah bia a kamh hna ti kha a kan theihter ṭhan. Stephen i a donghnak bia le martyr a sinak nih Bawipa bia zumhawktlak a sinak tehte a khan.

Hihi Bishop lianngan pakhat nih a kan thawhtermi phungchimnak chungin lakmi a si i, cu nih cun pehzulh tein Christmas thlacamnak caah rawl a kan pek:

Ruspe khuami Mithiang Fulgentius phungchim mi Dawtnak Ralthuam ah “Nizan ah kan zungzal Siangpahrang a chuah ni kan lawmh. Nihin ah a ralkap nih teinak a tuarnak kan lawmh. Nizan ah kan siangpahrang cu, a titsa puan aa hruk i, ngaknu paw chung i a umnak hmun kha a kaltak i, zaangfahnak he vawlei kha a tlawng. Nihin ah a ralkap nih a pum chung biakinn kha a chuahtak i teinak he vancung ah a kal” a ti.

Kan siangpahrang cu, a lianngannak a sang ko nain, kan caah toidornak he a ra; sihmanhsehlaw kut lawngin a ra lo. A ralkap pawl kha laksawng nganpi a pek hna i cu nih cun an rumter lawng si loin raltuknak ah tei khawh lomi a siter hna, zeicahtiah cucu dawtnak laksawng a si, cucu a Pathian sinak, i hrawm awkah minung ratpi ding kha a si.

A zaangfahnak cu a pek, asinain amah caah zeihmanh sunghnak a um lo. Khuaruahhar lam in zumhawktlak a zultu hna an sifahnak kha rumnak ah a thlen hna i amah pumpak rumnak kha a ngeih peng.

Cucaah, Khrih kha vancung in vawlei ah a ratpitu dawtnak nih Steven kha vawlei in van ah a thawhter; siangpahrang ah a hmasabik ah langhter a si, a hnuah a ralkap ah a ceu. Dawtnak cu Stephen caah raldohnak kipah teinak a hmuhmi hriamnam a si, cucaah a min in langhtermi lukhuh cu a tei. Pathian a dawtnak nih a hrutmi mibu sinah aa pe lo; a innpa a dawtnak nih lung in a cheptu hna caah thla a cam ter.

Dawtnak nih a palhmi hna kha chimhhrin awk, remh awkah a forh; dawtnak nih lung in a chehtu hna caah, dantatnak in khamh awkah thlacam awkah a hruai. A dawtnak ṭhawnnak nih Saul kha a tei i vawlei cung i a hremtu kha vancung ah a hawikom ah a tei. A thiangmi le a bau lomi a dawtnak chungah, chimhhrinnak in a thlen khawh lomi hna kha thlacamnak in hmuh a duh hna.

Atu a donghnak ah, Paul cu Steven he an i lawm, Stephen he Khrih sunparnak ah aa lawm, Stephen he a cawisan, Steven he uknak a ngei. Steven cu a kal hmasa, Paul nih a chehmi lung nih a thah, asinain Paul nih a zulh, Steven thlacamnak nih a bawmh.

Hihi, a hmaanmi nunnak cu a si ko, ka u le ka nau hna, Steven thihnak ruangah Paul nih ningzahnak a ngeih lonak nunnak, cun Steven nih Paul hawikomhnak ah aa lawmhnak nunnak, zeicahtiah dawtnak nih an pahnih in lawmhnak in a khahter hna. Mibu zaangfahnak a teitu cu Steven i dawtnak a si i, Paul i dawtnak nih a sualnak tampi a khuh; dawtnak nih an pahnih caah vancung pennak a tei.

Dawtnak cu, a ngaingai ti ahcun, thil ttha vialte i hrampi a si; cucu tei khawh lomi huhphenhnak a si, cun vancung lei a kalmi lam a si. Dawtnak in a kalmi cu lam a pial kho lo i a thin a phang kho lo: dawtnak nih lam a hruai, a huhphenh i a khualtlawnnak a donghnak tiang a phanhter.

Ka ule hna, Khrih nih dawtnak cu Khrihfa vialte vancung kai khawhnak ding caah a ser. Cucaah, lungtak tein fek tein i tlaih u, pakhat le pakhat hman khawhmi tehte i pe u law, nan tthanchonak thawngin, nan kai tti lai.”

Sunparnak in a thimi, Deacon Mithiang Stephen, thla kan campiak ko tuah.