Reflection For Nativity of The Lord

December 25

Radio veritas asia Hakha Service a ngaitu Dawtmi ulenau hna, Nan dihlak in Happy Christmas tiah kut nem kan in tlaih hna, atu cu Christmas ca i ruah awk tete ah kan kal colh rih ko lai.

 Dawtmi ulenau hna, a ra laimi Messiah kong chimchungbia vialte cu caw rawleinak kuang chungah a itmi ngakchia cungah a tling cang. Kum thong tampi thlacamnak lehnak ah Pathian nih a si tiah a kan pek. Kan i ruahchanmi tlanhnak cu atu ah a tlinnak a hmuh. Tlanhtu cu a ra cang.

Mithiang Paul nih Korin khua i Khrihfa hna sinah ca a kuatmi hna ah hitin a ti hna: “Pathian cu zumhawktlak a si bangin nan sin i kan bia cu “a si” maw “a silo” tiah a ti hna. Silvanus le Timote le keimah cu “a si” le “a silo” kan si lo, sihmanhsehlaw “a si” timi cu amah chungah a um. Kan sinin a rami ‘Amen’ zong amah thawngin, Pathian sunparnak caah a kal.” (2 Korin 1:18-20).

Zungzal Bia cu minung tuanbia caan chungah a lut i zungzal nunnak caah a hun. Minung a cannak, a chuahnak, a Nunnak, a Thihnak le a Thawhthannak ah Pathian i “YES – ASI” timi cu vawlei pumpi sinah pek a si. Dawtnak cu Christmas zingah a chuak i Amah chungah vawlei cu aa thawk ṭhan.

Cucaah, kan lehnak Salm ah thanhmi lawmhnak thawngpang ah Salm catialtu he kan i fonh. Yahweh nih a khamhnak ṭhawnnak kha a langhter, a miphun hna nih an hmuh khawhnak hnga a khamhnak dinnak kha a phuan, zumhawktlak a dawtnak le Israel innchungkhar cungah a fekmi a sinak kha a hngalh. Kan Pathian i khamhnak ṭhawnnak cu vawlei pumpi nih a hmuh cang.

2. A voihnihnak kan relmi bible ah, Hebrew cakuat a ṭialtu nih a fiantermi cu “Hlanlio ah Pathian nih kan pupa hna sinah profet hna hmangin bia a chim; sihmanhsehlaw kan chan, ni hmanungbik ahcun zeizong vialte rocotu ah a sermi le chan vialte a sertu a Fapa minung sinak in kannih cu Pathian sunparnak a langhtertu thawngin bia a kan chim. Amah cu Pathian sunparnak hmelchunhnak a ngeimi a si. Pathian lila nih, zeizong vialte kha a ṭhawngmi a nawlbia in a dirkamh hna;”

Hi a ṭhawngmi Biakam Thar cakuat daal linak ah Caṭialtu nih hitin a kan chimh: “Kan Tlangbawi Ngan hi kan santlaih lonak ah kan cung i zaangfahnak a ngei kho lomi tlangbawi a silo. Kan tlangbawi ngan hi kanmah bantuk tein tukforhnak a ingve mi asi, sihmanhsehlaw sualnak zeihmanh a tuah lomi a si” (Hebru 4:15). Zungzal Bia, Pa le Thlarau he a tlingmi lungrualnak ah a ummi, cucu Thumkomh Dawtnak a simi hi, caan le tuanbia taktak ah minung taktak ah a cang. Aho kan si kha a kan theihthiam. Minung hmuhtonnak dihlak ah a lut taktak i Amah chungah zungzal in aa thleng. Dawtnak cu nihin ah a chuak i Amah chungah vawlei aa thawkṭhan.

3. Cun, Missa Raithawinak caah Thawngṭha cu,  Jesuh i a dawtmi zultu Johan nih a ṭialmi Thawngṭha palinak chungin lakmi a si. Amah cu a donghnakbik thawngtha ṭialtu a si i Paschal Mystery timi cu Khrihfabu ah a ṭhangcho cuahmahmi hngalhthiamnak kha a langhter.

Johan Thawngṭha cu Thawngtha cauk pali lakah theological bik a si i, Christmas ah kan tuahmi thil a biapitnak kong he pehtlaiin, Khrihfabu hmasa hna nih an rak ruahmi a puitlingmi ruahnak aa tel. Mirang holh in lehmi “kan lakah a um” timi biafang cu “Kan lakah a thlam a sak” tiah leh khawh a si. Hmuh khawh lomi ceunak chung i a ummi, ahohmanh nih an hmuh bal lomi le an nung bal lomi, vawlei pumpi ah Pathian cu minung ah a cang. Amah cu a derthawmmi ngakchia ah a cang i lakah a rak um (A nung). Kanmah lakah minung a cang i kan sinah a inn a ser. Amah chungah atu kan nunnak kan hman bantukin kan sinah a um peng.

Jesuh Khrih a chuah cang caah, atu cu kan kalnak ding Lam thar kha pek kan si cang. Dawtmi zultu Johan nih “Pathian fa sikhawhnak ṭhawnnak” (Johan 1:12) tiah a timi kha pek kan si cang. Zangfahnak thawngin Dawtnak thim khawhnak le Amah muisam le amah muisam ah thlen khawhnak kan hmuh cu Dawtnak minung sinak, Jesuh Khrih a si. A chuahnak kan lawmhpi mi chungah hrinṭhannak le nunnak thar kan hmuhkhawh.