Reflection for Friday

December 20, 2024 – (Luke 1:26-38)

Luka 1:26-38 cu tuanbia ah tuanbia thar aa thawknak ni a simi “Mary sinah Pathian vancungmi thawngthanhnak” kong a si. Hi bible cacaang chungin tlawmte ruatṭi hna u sih.

Mary sinah thawngthanhmi khuaruahhar thil cu a tlu (thi) cang mi minung (ci) tefa sinak tel loin Mary nih Pathian fa a hrin lai timi kha a si. Cubantuk thawngthanhnak cu Thiang Thlarau cu Mary cungah a rung ṭumnak thawngin a tlam a tling i Pathian khuakhannak kha a hung si  taktak.

Mary nih vancungmi sinin Pathian bia, thawngthanhnak bia a lehmi cu zumtu hna caah zohchunh awk tlak taktak a si. Cubantuk thawngthanhnak cu minung hna caah a si kho lomi a lo nain Mary nih a zumh i a cohlaan. Mary i zumhnak bantuk kha nihin Khrihfa mi hna nih kan ngei kho cio maw?

Mary i zumhnak cu zumtu hna nih nifatin kan nunnak ah kan i zohchunh awk zong a si. Taksa leiin Jesuh hringtu nu le pa dirhmun ah kan si dih kho lo nain Pathian bia (khamhnak bia) cu kan cungah a tling taktak te lai timi cu kan zumh khawh cio mi a si.

Mary dirhmun ah Pathian nih a cungah zeitindah a timhtuahnak a tlamtlinter lai timi kongah aa ruahchan khawhmi le a hngalh khawh mi zeihmanh a um lo. Pathian kha a zumh i cu a zumhnak ah cun a zeizongte pekchanh in (na chim bangin ka cungah si ko seh) Pathian duhnak le timhtuahnak cungah a nungmi Nu a si. Mary bangin kan zumhnak cungah, zumh fek tein kan nun a hau.

Minung sinakin Jesuh Khrih cu a thi taktak, a thoṭhan taktak, cun vancung ah a kai taktak timi zumhnak kha kannih Khrihfa mi hna zong nikhatkhat ah kan si telai timi zumhnak in nifatin kan nun a hau.