Reflection for Monday – December 16, 2024

(Matthew 21: 23-27)

Matthai 21:23-27 hi nawlngeihnak kong le Jesuh le biaknak lei hruaitu hna karlak i a donghnak buainak kong a chimmi Bible caang pakhat a si. Hi Thangṭhabia chungin tlawmte ruatṭi hna u sih. Nihin ni caah kan relmi chungin nawlngeihnak, tuahsernak hmual, ṭihnak le toidornak tiin ruahawk tete an um.

Biaknak lei hruaitu hna nih Jesuh kha a nawlngeihnak hrampi he pehtlaiin bia an hal i, Jesuh nih Tipil petu Johan tipilnak cu vancung in maw a rami a si, minung sinin dah a si tiah a hal ṭhan hna. Biaknak lei hruaitu hna cu Jesuh i bia hal ṭhannak kha an theih tikah lungretheihnak  le bialeh awk thei loin an um; cun bia kan leh a si ahcun kan palhsual lai tiah an ruah i a donghnak ahcun Jesuh cu bia an let duh lo.

Jesuh nih fapa pahnih bianabia zong kha biaknak lei hruaitu hna i an zumhnak taktak langhter awkah a hman ṭhan. Bianabia nih a chimmi cu, a pa halmi ka tuah lai a ti nain a tuah lomi fapa le ka tuah lai lo a ti nain a tuah taktakmi fapa kong kha a si. Jesuh nawlngeihnak cu a tuahsernak nih a fehter, cu ahcun damnak, thianhnak le mit hmuhṭhannak hna aa tel. Cucaah bia sawhsawh men nakin tuahsernak hi aw thangdeuh in theih a si zungzal timi zong kha fiang tein kan hmuh khawh.

Biaknak lei hruaitu hna cu taksa sinakin an ngeihmi aanaa le chawva sungh lainak caah ṭihphannak le anmah nawlngeihnak kilven duhnak lungthin lawngin a nungmi an si zong kha hmuh khawh a si. Jesuh tu cu a minthannak a hrawk khomi a si hmanhah ṭihnak ngei loin thil dikmi kha ahmaan ningin a chim zungzal tu a si.

Sualnak a tuahmi le aa porhlawmi hna cu nawlngeihnak sangbik a ngeimi Jesuh (Pathian) he an iton tik caan paoh ah, tangah thlak a siloah niamter an si zungzal ko lai. Khrihfa mi hna sinah hmuh awk a si zungzal mi cu tangdor thiamnak lungthin ngeih ding kha a si ko. Cucu Jesuh hrimhrim nih Pa Pathian nawl a ngeihnak le Pathian bia kha tangdornak lungthin he a cohlaan zungzal caah a si.