December 15 – 3rd Sunday of Advent

1. Zephaniah cu Hebru Cathiang chung i profet hmete hleihnih lakin pakhat a si. A phungchim rian cu biaknak dang a bia lomi miphun nih ahmaan lomi pathian an biak lio caan ah a si. A bia cu a fiang ko, Pathian taktak, Israel Pathian biaknak leiah i mer ti asi. Israel miphun cu an pawngkam i a ummi nunphung ahmaan lomi biaknak le ziaza rawhralnak nih a tukforh hna i Prophet nih ruahchannak a pek hna.

Bawipa nih Profet hmangin mipi sinah bia a chim, an sinah a um ti kha a theihter hna – cun anmah aiawh in a doh hna. Cun, thinphang a herh lo ti zong kha a si. Cun, an tonmi harnak chung hmanh ah, nifatin Amah lei an i mer i Biakamnak ah zumhawktlak tein an um ahcun, Amah cu an lawmhnak hrampi a si lai ti kha a si.

Milem biaknak le ziaza rawhralnak phunthar in a karhmi nunphung, Khrihfa hram a hlawtmi nunphung lakah nihin kan dihlak caah zeibantuk thawngpang dah a si? Kannih cu Tipil innak biakamnak ah zumhawktlak tein um awkah auh kan si. Zeihmanh tih awk kan ngeilo ti kha kan i cinken – zeicahtiah Bawipa nih kan caah a doh. A donghnak ah, thlacamnak le sacrament ah i telnak ah zumhtlak tein kan um ahcun, a lawmhnak cu kan nitin nunnak ah aa tel kho, zuamnak chung hmanh ah, a si kho tiah an kan ti.

Atu Advent Zarhpi avoi thumnak ah zeitindah kan um?

2. Advent zarhthumnak cu Gaudete Zarhpi ti a si, Latin holh in LAWMHNAK tinak a si! Lawmhnak cu Khrihfa nun ah a langmi Thiang Thlarau theitlai pakhat siding a si (Galati 5:22 zoh). Filipi khuami hna sin a cakuat chungin hi catlang ahhin Lamkaltu Paul nih “LAWMH ZUNGZAL U” le “ZEITIKHMANH AH THINPHANG HLAH” tiah a ti hna. Asinain thlacam le Bawipa bochan ko. Atu cu, hi kong hi a konglam ah kan chiah a hau.

Hmasa Khrihfa hna cu a fakmi le langhngan in hremnak an rak tong. Kan ruahkhawhmi nakin Bawipa zulh ding rian hardeuh an ngei. An zumhnak cungah nifate ralchanhnak an tong. Sihmanhsehlaw, annih cu Lawmhnak in an um peng awk a si i lungrethei loin an um awk a si. ZEITIN? Aṭha, aphi cu a sawhsawhte a si i Paul nih hi cacang lila ah hin a chim:

“…thlacamnak le halnak in nan duhnak vialte kha Pathian sinah chim u law kan hngalh khawh lomi Pathian daihnak nih Khrih Jesuh chungah nan lungthin le nan ruahnak kha a huhphenh hna lai.” Cucu kan tuah maw? Kanmah nunnak ah Thawngtha Lawmhnak theipar kan langhter maw?

3. Hi Advent Zarhpi avoi thumnak, Gaudete caah chiahmi Thawngtha cauk cu Tipil petu Johan kong lawngte a si. Amah cu aa dangmi thilthuam aa hrukmi le aa dangmi rawl a eimi kha mi tthalo ngaiin kan ruah tawn. Sihmanhsehlaw, Thawngtha nih Jesuh he an i ton hmasabik lio ah a nu Elizabeth paw chungah a um rih i Jesuh cu Mary paw chung ah a um rih tiah a kan chimh. Johan cu Jesuh hmai ah nu paw chungah lawmhnak in a it (Luke 1:41-47).

Hi Thawngtha cauk chungah hin Bawipa ratnak caah zeitindah timhtuahnak ngeih ding a si timi mipi kha – an nunning thlen ding a chimh hna. Advent nih cun piangtharnak ah – kan nunning thlen awk ah a kan auh. Mah nih lawmhnak a kan pek lai. Zeitindah kan um?