Pope Francis: Nunnemnak, i upatnak cu ‘bia alnak thazaang’ nakin a ṭha deuh
Vatican City, Dec 11, 2024 / 10:25 am
Pope Francis nih biaknak he pehtlaiin aa pummi khualtlawngmi thong tampi hna sinah “bia alnak thazaang” nih Jesuh Khrih le a Khrihfabu kong mipi zumhter khawhnak ding caah a tling mi diriamnak a pek kho hna lo tiah a ti.
Tuzarh “Thlarau le Nupi” timi a ṭhen 17nak a simi catechetical series a donghnak cawnpiaknak ah, Pope nih “thawngṭha chimnak ah a hmasabik le a ṭhabik mi cu midang hna sinah dawtnak kan langhter mi hi a si” tiah a ti.
“Lamkaltu Peter nih hmasabik Khrihfa hna kha hi bia hin a rak forh hna: ‘Nan lung chungah Khrih cu Bawi ah ser u. Nan chung i a ummi ruahchannak kong a ruang an in halmi hna paoh khan nan i ven khawhnak hnga ding caah timhcia tein um zungzal u’ (cf. 1 Pt 3:15),” tiah Pope nih Vatican i Paul VI Hall chungah aa pummi a cawnpiaknak a ngaitu hna sinah a chim.
“Asinain kan theih awk a simi cu, Nemnak le upatnak he tuah ding a si,” tiah a ti.
Tuzarh cawnpiaknak ah, Pope nih a timi cu, Jesuh Khrih le Thiang Thlarau cu “khamhnak rianṭuannak ah” ṭhen khawh a si lomi an si tiah a ti hna.
Thiang Thlarau cu “Khrihfa ruahchannak hrampi a si zungzal” tiah a ti i, Pope nih ruahchannak timi theological virtue (zumhnak, ruahchannak, dawtnak) cu “Khrihfabu (bupi) nih minung vialte sinah a pek khawhmi laksawng lakah aa dawh bikmi a si” tiah a chimchap.
Pope nih Thiang Thlarau cu “hlan bantukin nihin kan tuanbia rili chung zongah hmailei ah a kalpitu tilawng a si” tiah Khrihfabu (bupi) kha tilawng he tahchunhnak hmang in a ti rih.
“Ruahchannak cu bia sawhsawh asiloah thil sining a ṭha teko lai timi duhnak sawhsawh a si lo. Ruahchannak cu ahmaan taktak mi a si. Zeicahtiah Pathian cu a biakamnak cungah zumhawktlak tein a um zungzal caah a si,” tiah Pope nih a bia a ngaitu hna sinah a chim.
“Cucaah theological virtue “biaknak lei he pehtlaiin tuahsernak dawh- zumhnak, ruahchannak, dawtnak” tiah auh a si. “Zeicahtiah Pathian pekmi a si i Pathian nih amahkhan mi zong a si,” tiah a chimchap.
Syria ram dirhmun le daihnak caah thlacam
Kum 50 chung Assad cozah uk hnu ah, Pope Francis nih Dec. 8 ni ah a bia a ngaimi hna sinah Bawinu Mary tlangtlak piaknak thawngin daihnak a um khawhnak hnga thlacam dingin sawmnak zong a tuah.
“Atu lio kan tuanbia hi a hninghnotuk mi caan a si bantukin Syria zongah a cangmi thil he pehtlaiin hlathlainak kan ngei ko. Thennak le buainak a karhtertu si loin ram chungah daihnak a sertu, ramkhel lei in remnak kan phan lai tiah ruahchannak ka ngei,” tiah a ti.
“Bawinu Mary tlangtlak thlacam piaknak thawngin Syria mipi hna zong an ram ah daihnak, himnak he an um khawh ṭhannak hnga le kum tampi chung raltuk ruangah harnak a tongmi hna pakhat le pakhat i upatnak le i hawikomhnak in an kal khawh ṭhannak hnga thla kan campiak hna” tiah a ti.
Pope nih Hall chung i a ummi ramkip khualtlawngmi thong tampi hna sinah Ukraine, Palestine, Israel le Myanmar ram hna zongah, dinlonak ruangah fahnak a tuarmi, mipi hna ca zongah thlacampiak dingin a sawm hna.
“Ral cu sunghnak a si zungzal. Remdaihnak caah thlacam hna usih,” tiah Pope nih a ti.