NU LE VA KHAT LE KHAT CUNGAH CHIAHDING MI ṬUANVO
PAKHAT LE PAKHAT DINFELNAK
Catholic Bupi ah a ṭhitum mi nu le va hna cu pumkhat an si (Gen, 2:24). Nu le va hna cu chungkhar kongah keimah pumpak ti duhnak, ruahnak abimi “Keimah” timi biafang hi hmanawk asi tilo. Va asiah nupi asiah “Kannih chungkhar” tiin hmandeuh ding asi.
Nupi le va hna cu chungkhar ah “nangmah ṭuanvo, keimah ṭuanvo, nangmah rian, keimah rian, nangmah kongkau, keimah kongkau, nangmah thil, keimah thil” tiah thleidan khawh an siti lo. Kannih rian, kannih ṭuanvo, kannih kongkau, kannih thilri, kan chungkhar timi hngalhnak le cohlannak, theihthiamnak chiahding asi. “Keimah” timi abimi ruahnakin, abimi chungkhar in, a kau chinchin mi ruahnak ah chuah a herh.
Kannih innchungkhar timi biafang hmannak cu a zapi he aa pehtlai mi sinak kha a langhter. Nu le va pahnih tein a nganmi chungkhar ṭuanvo kha i cheuh in ṭuanvo lakding asi.
Innchungkhar rian kha kanmah rian asi tiin duhnak lungthin ngeih a hau. Ṭuanvo tlolhhnak, lungduh lonak cu chungkhar hrawk bantuk asi.
Keimah timi lawng a duhtu cu amah saduhthah, amah duh herhmi, amah lung diriamnak, amah nuamhnak lawng kha papekin a tuahtawn. Abiapi ah a chiah tawn. Midang duhherhmi, midang ruahnak, midang hna lungtlinnak kha zei an rel tawnlo. I pekchanh mi nakin hmuh lei lawngah ṭuanpiak mi nakin fialding tu kha an duh deuh.
Nu le va an pahnih tein ‘Keimah’ tiah an ti chung paoh cu pakhat le pakhat an i duhdawt taktak kho lailo. Pakhat kha rianṭuanpiaktu minung lawnglawng ah an chiahtawn hna. Aa tluk tein an i kawm kholo. Nu le va pahnih hna cu rianṭuan piaktu minung an silo. A dot aa khatmi minung an siko. Rianṭuan piaktu a silo mi, upat awk tlak asimi minung kha rianṭuan piaktu menmen ah an komhtawn mi hna cu ngaihchiat awk ngaingai asi.
Keimah timi lungthin a ngeimi hna cu chungkhar rian nakin amah rian lawng kha papekin a tuah tawn.
Keimah timi thinlung a sang chinchin mi chungkhar ah ṭuanvo tlolh, nupi le va keimah timi hrihnuknak ruangah isik velhnak, ṭuanvo tlolhnak le harnak tonnak ṭhathnem lonak hna a chuahter i a donghnak ahcun chungkhar ṭhen hramthawhnak ah a phanh tawn.
Nangmah cu keimah timi lungthin na ngeihchung paoh cu chungkhar ṭha pakhat na sikho bal lailo. Keimah iti duhnak thinlung cu duhdawtnak a zortertu hmelchunhnak pakhat asi.
Nu le va hna cu pumpak thinlung ruahnak lawng kha papekin an tuah tikah cun dawtnak ralchanh in asiloah dawtnakin an pial i rian an ṭuantawn. Mithiang Paul nih pumpak lungthin ruangah a chuak khomi sualnak kong a langhter mi cu, “Minung sining nih a tuahtawn mi cu a fiang ko, nu le pa sualnak te hna, a thurhnawmmi thil tehna, aa dawhcah lomi thil tehna, siasal biaknak tehna le dawih le eih tehna hi an si. Pakhat le pakhat an i ral an i do, an i nahchuah, an thin a hung anmah zawncio lawng an ruat, an i ṭhen. Ziar an i ngeih, zu an ri, an au an khuang i cubantuk thil tampi kha an tuah lengmang hna” (Gal. 5:19-21) tiah a ti.
Adik mi duhdawtnak cu pumpak thinlung kha a hlonhpiak. Adikmi dawtnak cu pumpak thinlung a ngeilo. Chungkhar lei kulhchung na luh le cangka nang cu na pumpak thinlung kha na thihter hrimhrim lai.
Na pumpak thinlung thihter na ngamh maw?… Ruatṭhan tuah uh!
Pumpak ti duhnak nih an halnak tehna,
Pumpak i duhherhnak tehna.
Pumpak a nuamhnak tehna,
Mah ca lawngah a lomi pumpak thinlung hna kha na duhdawtmi caah na hlawt ngamcang maw …?
Na innchungkhar caah hlawtding in timhcia na sicang maw? Cucaah mi thiamsang pakhat nih hitihin ralring a kan pek.
“Nang cu sullam ngeite le nuamtein ṭhitum lehthahnak ngeih na duh ahcun pumpak thinglung he i ṭhen hmasat…” tiah a ti.
Dawtnak timi cu mah duhmi ngolnak …
Pumpak duhnak na tlaihchanh chung paoh na ngol kho lailo.
Dawtnak timi cu ngaihthiamnak asi … a ti.
Keimah pumpak duhnak hri naa ngerh chung paoh na ngaihthiam kho hna lailo.
Dawtnak timi cu zawnruahnak asi … ati.
Keimah pumpak kha na pomchung paoh zawnruahnak na ngei kho bal lailo.
Dawtnak timi cu theihthiam piaknak asi … a ti.
Keimah pumpak khuhchilhnak tangah na theihthiam piak kho bal hna lailo.
Keimah ca lawng timi pumpak thinlung hlawtkho loin nang cu dawtnak rili asimi chungkhar nunnak chungah ka lutcang lai na tiah cun tichung i zuksuai bantukin saduhthah dawtnak hna cu pakpalawng asi lai.
A nuammi, lung hnangam mi, a daimi chungkhar vancung inn pakhat na ser kho lailo ti cu a fiangtuk mi asi.