Ka Seihnam kha i bei u

Retheih thabaat le lungfah intuarnak kan ton caan ah Pathian nih a kan philh hlah maw ti lunghrinnak a chuah fawi tawn. Minung thisa le khuaruahnak nih a celh lo caan a um ṭheu. Isiah chung i a um mi cathiang, nihin kan rel mi hi mah intuar khawhnak thazaang a der mi le, a lungdong mi hna caah thazaang peknak asi. Pathian khuaruahnak cu tah khawh, khiah khawh mi asi lo. Mi chambau hna le mi zaangder hna caah thazaang petu Pathian asi. Mah thazaang le ṭhawnnak hmuh duh asi ahcun na tuah ding pakhat a um. Mah cu zei asi tiah cun toidornak he Pathian sin kaarhlannak hi asi. Na fim na thiam ngai kho ko men. Vawlei fimthiamnak in le vawlei phun in Pathian hi naih hlah. Na hmu kho lai lo. Na tong kho lai lo. Cucaah Gospel chung ah, “rethei thaba mi hna ka sin ah ra u, ka seihnam cu a zaang,” a ti. Mah hi, retheihnak a tlau lai a ti duhmi asi lo. Retheihnak zeitin na tei lai ti a chim duhmi asi. Khrih he nunnak nih vawlei harsatnak a tei khawh. Khrih he nun khawh i zuam hna usi.