December 5- Reflection

Advent Zarhkhatnak Thursday

Lamhruainak: Vanram cu zungzal kan umnak inn le khua a si. Pathian cungah vawlei nunnak inn a sakmi lawng nih cu vancung umnak ah an lut kho lai.

1. Nihin Pathian bia ah, tahchunhnak pahnih, a biapimi tuahsernak pahnih, le aa dannak phunhnih kan ngei. Cu hmanthlak pahnih cu pennak asiloah khua a si i a dang pakhat cu inn a si. Cu thil tuahnak pahnih cu “luh” le “saknak” an si. Aa dangmi phunhnih cu a hram lungpi le thetse hrampi, cun fimnak le hruhnak an si.

2. Vanram cu, cu pennak asiloah khua a si. Cu hmun cu kan timhmi hmun asi i kan luh awk a si. Asinain aho nih dah a luh khawh lai? Zumhnak a zulmi miding; Pathian cungah aa hngatmi ; Pathian aa bochanmi; Pa duhnak a tuahmi lawng nih an lut  lai.

3. Cucaah “Bawipa, Bawipa” ti lawngin a za lo. Asinain Pathian duhnak tuah kha a biapi deuh. Thlacamnak phunphun chim asiloah aw thangpi in thangthatnak tuah asiloah lunglawmhnak bia chim lawngin a za lo. Cu nakin, hi vialte nih hin Pathian duhnak tuahnak kha a bawmh awk a si, a aiawh awk a si lo.

4. Kan nunnak cu, inn bantuk a si. Cun kan hmai ah hrampi phunhnih a um. Pakhat cu lung hram a si i, a dang pakhat cu thetse hram a si. Pathian, amah kha i bochan law, a duhnak tuah hi lungpi phunkhatnak a si.

5. Vawlei, i bochannak le vawlei lam diklo zulh hi a pahnihnak hrampi a si. Inn pahnih nih thil cangmi le harnak aa khatmi an ton, cu hna cu ruah, tilian le thli hna an si. Asinain an sining cu aa dang: lung cung inn cu fek tein a dir i a rawk lo; thetse cung i inn cu a cim.

6. Sihmanhsehlaw, hi thil vialte hi pakhat le pakhat an i pehtlai. Lungpi cungah fimkhur tein inn a sakmi hna cu pennak chungah an lut lai. Asinain thetse cungah mihrut ngai in inn a sami cu luhter an si lai lo.

Cawnnak: Fim tein um. Pathian kha i bochan. Zumhnak lungpi cungah na nunnak sa. Bia sawhsawh lawngin lungsi hlah u law Pathian duhnak kha tuah u. Cuticun Pathian pennak chungah na lut hrimhrim lai.