Reflection for Wednesday

November 27, 2024 – (Luka 21:12-19)

Nihin caah kan relmi Thawngṭha hi kan ngaih tikah minung sining in cun ṭih a nung ngai mi Thawngṭha bia a si. Jesuh nih mibu kha hitin ralrinnak a pek hna: “Hi thil vialte an tlun hlanah hin nannih cu tlaihkhih nan tong lai i hremnak nan ing lai; pumhnak inn ah khan biaceih awkah an in chuahpi hna lai i thong ah an in thlak hna lai; keimah ruangah siangpahrang hna hmaiah le uktu bawi hna hmaiah an in chuahpi hna lai” tiah a ti hna. Cun zeibantuk bia dah kan chim lai tiah lungrethei in um hlah u tiah a ti hna i, “Nan ral ahohmanh nih an in tei hna i an in al khawh hna nak hnga lo, bia le fimnak kha kan pek hna lai” tiin thazang a pek hna. Cun Jesuh nih a dang ralrinnak a pekmi hna cu, chungkhar hna sinin rawinak, a cheukhat cu thah zong an tong lai tiah a ti hna.

Mah bia a chim hnuah Jesuh nih a bia a ngaitu hna sinah hnemhnak bia tlawmpal a chim. “Ahmaan ko, keimah ruangah mi vialte nih an in huat hna lai.  Sihmanhsehlaw, nan lucung samfa fakhat hmanh a tlau lai lo. Fek tein dir ko u, zeicahtiah hitihin pei nan nunnak cu nan khamh lai cu,” tiah a ti hna. Theih ding a si mi cu Jesuh nih Amah hnuzulh dingin a kan auh ko timi kha a si. Nunnak kan duh a si ahcun zeibantuk harsatnak (vailam) hmanh kan ton zongah Jesuh hnuzulh ding kan si ko.

Jesuh bia hna nih vawlei cung sining, kan hmuh kan ton mi le kan theihmi thil taktak hna kha fiang tein an langhter khawh. Hi vawleicung ah, mi tampi cu an zumhnak fek tein an i tlaih ruangah thongtlaknak, hremnak le thahnak tiang a tongmi tampi kan hmuh khawh ko hna. Vawlei cung thil sining tampi thawngzamhca in siseh, online in siseh tampi kan rel kan theih khawh. Hi bantuk thil sining kan hmuh kan theih mi nih Jesuh sin panhṭhan dingin an kan bawm kho maw, asiloah mah fimnak le ṭhawnnak lawng, i rinh in Jesuh chimmi bia kha kan hlaw maw?

Nihin kan relmi Thawngṭha nih zeidah tuah dingin a kan sawm? Kan tonmi pumpak pakhat cio kha kan upat hna maw?  Asiloah thawngpang, lihbia le hlennak in pakhat le pakhat kan i hrocer maw? Kan bia le tuahsernak hna kha i ralrin ding a si. Thil ṭhalo tuah ding maw, asiloah thil ṭha tuah ding dah timi kha kanmah tein thimnak nawl kan ngei. Jesuh hnuzulh ding maw hlawt ding dah! Zeidah nai thim lai?