Myanmar ram caah Pope i Nawlnak

Pope nih Myanmar ramchung buainak donghter ding le remdaihnak caah lungtak tein tonbiaruahnak ngeih dingin thla a cam

Daihnak hmuh khawhnak hnga caah phu vialte a telmi tonbiaruahnak a herh timi kha Zarhpi ni Angelus a donghnak ah Pope Francis nih a chim `han. Buainak ruangah harnak a tongmi hna philh lo dingin Vatican hmai i aa pummi zumtu hna kha a sawm `han hna. Abikin Myanmar ram a rak hnin dih mi kong a chim. November 25 cu, 1920 lio i a voikhatnak bik university siangngakchia hna lampi zawh in duhlonak an rak langhternak philhlonak ni zong a si.

“Thaizing cu Myanmar ram nih zalonnak lam (independence) a rak hruai hmasa bikmi siangngakchia hna duhlonak an rak langhternak philhlonak ni le, nihin ni tiang a tlamtling kho rih lomi daihnak le democracy chan ruahchannak, ram pumpi puai a si. Kawlram milu dihlak, ahleiin atu lio i dohnak ruangah harnak a tongmi hna caah, ahleiin a derthawm bikmi hna: ngakchia, tar, mizaw, ralzam, Rohingya telh in ka zaangfah hna nak langhter ka duh. Hriamtlai hna le party vialte hna nih an hriamnam chiah in, a hmunmi daihnak a chuahter khomi, phu vialte telh in tonbiaruahnak thawk dingah lungthin tak tein kan nawl ko hna,” tiah Pope Francis nih chim.

Cun, Pope nih Ukraine, Palestine, Israel, Lebanon le Sudan ram hna ah daihnak a um khawhnak ding caah mi vialte kha fakpiin thlacam peng dingin a nawl hna.