Reflection for Friday

November 22, 2024 (Luka 19:45-48)

Nihin caah kan relmi Thawngṭhabia hi a tawi ngaingai.  Bible caang 4 lawng a si. Asinain buaihnawhnak bantuk sining in aa thawk kha kan hmuh khawh. Jesuh nih fung aa lak i tangka thlengtu hna kha biakinn pawng in a ṭhawl hna! Hihi kan “hmuh” tawnmi Jesuh nunning le sining a si lo. Jesuh cu a Pa inn a simi a thiangmi biakinn ah chawlehnak le tangka hmuhnak caah hman a si kha a hmuh tikah a thin a hung ngaingai. A Pa biakinn thiang cu an thurhnawmhter. Cu caah fung aa lak i tangka thlengtu hna kha biakinn chungin a ṭhawl dih hna.

Biakinn tibantuk a thiangmi le a himmi hmun hna kha mah siṭhatnak caah, tangka hmuhnak hmun ah a ruatmi an um kho. A caan ahcun, a thianghlim mi hmun ah kan um ti hmanh philh khawh sual a si. Biakinn ah nan um tikah dai tein minutes tlawmpal ṭhut dingin kan sawm hna. Thluachuah pekmi hmun le a thianghlim mi hmun ah dai tein ṭhu law Pathian nih an dawtnak, thluchuah an pek ning, a veel in an umpi ning hna kha ruat hmanh. Pathian hmai ah ka ṭhu, ka um ti kha philh hlah.

Minung kan si bantukin, a thianghlim mi biakinn, a daimi hmunhma -ramlak, rili, tlang asiloah a daimi pawngkam kan herh cio dih. “A thiangmi” kan hngalh tikah, Pathian cu kan sinah a um ti kha kan hngah a si ahcun lunglawmhnak in kan khat zungzal ko lai. Kan nun ning zong aa nuam zungzal ko lai.  Ṭhat lonak le tukforhnak hna zong kan tei khawh zungzal ko lai.