Reflection for Thursday

November 14, 2024 (Luke 17: 20-25)

Na nunnak ah Pathian pennak kong theihhngalhnak na ngei cang maw?

Farasi mi a cheu nih Jesuh cu, zeitikah dah Pathian Pennak cu a tlun lai, tiah an hal. Anih nih a leh hna i, “Pathian Pennak cu hmuh awkin a ra lo. Ahohmanh nih ‘Zohhmanh, hika ah a um hih, khika ah a um khih,’ an ti kho lo; zeicahtiah Pathian Pennak cu nan chungah pei a um cu,” tiah a ti hna.

Pathian pennak kong kan hngalhning aa dang cio. Cheukhat nih cun a ton zong an ton cang. Cu bantuk mi hna cu Pathian cungah zumhnak fek a ngeimi le a ngan a dammi thlacam nunnak in Pathian he naih tein aa pehtlai kho zungzal tu hna kha an si.

Midang a cheu nih cun an nunnak ah Pathian pennak kongah an lungre a thei lo. Ngaihchiat awk le zangfah awk an simi cu an ruahnak ah hi vawlei in an thih hnu cun zeihmanh a um ti lo timi ruahnak an ngeih caah a si.  Hi midang hna ahhin kan caah zuamcawhnak a um. Hi zawn ahhin kan caah zuamcawhnak (challenge) a um. Pathian Pennak cu a um taktak; taksa thih hnuah zungzal nunnak a um rih timi an theihkhawhnak hnga zeidah kan tuah awk a si?

Pathian pennak kong kha kan chim awk a si maw, kan cawnpiak hna awk a si maw? A si. Phung kan chim a hau, kan cawnpiak hna a hau i kan nunnak ah Pathian pennak kan i nunpi ding zong a hau.  Cutin kan tuahlo ahcun kanmah hrimhrim zong theihhngalhnak kan ngei kho lai lo i sualnak ṭih loin kan nung sawh men sual lai.

Jesuh a hngalmi le amah he pehtlaihnak a ngeimi kannih caah cun Pathian pennak cu kan chungah a um ko cang. Cucaah kan tuah dingmi le kan i zuam dingmi cu Jesuh kong midang sin hrawmh ding kha a si i cuticun annih zong nih Pathian pennak kong an hngalh ve lai.