Reflection for Tuesday

– November 5, 2024 – Luke 14:15-24

Nihin kan relmi Thawngṭhabia chungah, Siangpahrang pa nih rian a fial hna tikah a hmanmi biafang pahnih hi ruat ṭi hna u sih. “Khulrang in zatlang lamah siseh, inn le inn karlak lamah siseh, ‘va kal’ law sifakmi si hna seh, kutzeng kezeng si hna seh mitcaw si hna seh ‘hun pi’ hna,” tiah a ti (Lk 14:21). Nihin kannih kan chan zongah “Mission” rian kal ding “Tuu tlau a kawlmi tuukhal” bantukin Khrihfa mi hna, lam a pial sualmi  kan hawi tuu tlau hna kha kawl in Jesuh sin, Pathian sin ah kan ratpi hna ding a si.

Pathian nih a kan pek cio mi mission rian kha sinumpa nih Siangpahrang pa fialmi rian khulrang in a tuah bantukin kannih hna zong nih kan tuah awk a si. Cu rian cu lunglawm tein le thatho tein kan tuah awk a si.

Cun, Siangpahrang pa nih a tuahmi rawldanghnak puai he aa lomi “Eucharist” “Missa” raithawinak ah an i tel khawh cionak hnga ding caah “sawm”, “sifakmi si hna seh, kutzeng kezeng si hna seh, mitcaw si hna seh hun pi hna” ding a si. Mi vialte hna sinah Pathian Thawngṭhabia kha kan chim ding a si.

Hlan Khrihfa hna cu Bawipa a raṭhan zau lai timi ruahnak an rak ngeih caah Bawipa Thawngṭhabia chim kha lungtho ngaiin le thanuam ngaiin a rak tuah tawn. Tuchan kannih Khrihfa mi hna zong nih Bawipa Thawngṭhabia chim le phuan kha kanmah le kan si khawh ning cio in phuan ding le kan tuah cio a herh.