RAWL DANHNAK

Reflection on Luke 14:12-14 (November 4, 2024)

Sabbath ni ah Jesuh cu nawlngeitu Farasi pa nih a inn ah rawl-ei dingin a sawm. Jesuh nih a sawmnak kha a cohlan. Rawl an ei ṭi lio ah, Jesuh cu inntek a simi Farasi pa he bia an i ruah. Jesuh nih; “Rawl danhnak na tuah tikah, misifak, kutzeng, kezeng le mitcaw kha va sawm hna law annih nih an in cham khawh lai lo caah thluachuahnak na hmu lai. Miṭha mi kha thihnak in an thawhṭhan tikah Pathian nih an cham lai” tiah a ti. A cham kho ṭhan kho hna lomi kha na sawm hna ah cun thluachuah na hmu lai tiah bia a kamh kha a si. Mipa nih zeitindah a leh hnga ti kan ruat. Thawngtha nih a chim lo.

Nihin ah Jesuh nih kan lak i a niam bikmi hna kha cohlaan hna dingin a kan sawm. Khuazei kan um hmanh ah kan lakah sifak kan ngei hna. Kan lak i mi sifak hna hi chawva lei in an chambau men lai lo. Inn dawh, hlawh ṭha le nunnak ṭha a ngeimi an si kho men, asinain a biapi mi lam “Pathian dawtnak le theih hngalhnak” ah a si a fak taktak mi an si kho.

Kan zalonnak hmun lawngah um loin sifakmi hna kha kan sinah “Pathian dawtnak theihter hna ve dingin” sawm kan duh hna maw? An caah ka innka le ka lungthin ka hunpiak hna lai maw? Hi tin tuah dingah timhcia kan si lo ahcun, nihin Jesuh nih kan lungthin a kan hunpiak i a niam bikmi sawm khawhnak zangfahnak le ralthatnak run kan pe ko tiin hal ve ding kan si. Hiti kan tuah ahcun laksawng nganpi pek kan si ko lai.