Thianhternak Hmun

“Zeicahtiah Fapa kha a ka hmu i a ka zummi paohpaoh cu ni hmanung bikni ah nunnak in thawhter kha ka Pa nih a duhmi cu a si.” (John 6:40)

Nihin ah, velngeihnak in a thimi tampi hna Pathian sunparnak bawiṭhutdan hmai ah dir in, Pathian hmaitonh in hmuh awkah timhcia an si colh lai lo ti kha kan philh lo. Pathian he hmaitonh in ton khawhnak lam pakhat a ummi cu, sualnak vialte le sualnak he aa pehtlaimi vialte kha kan thlarau chungin thianh dih a si lawngah a si kho. Zungzal Vancung sunparnak chungah direct in luh kan duh ahcun kan zeizong vialte a thian dih a hau. Asinain cu bantuk dirhmun ah a ummi minung zeizah dah an um hnga?

Bupi nih, kumzabu tampi chung fiang tein a cawnpiakmi cu, mi pakhat hi vawlei nunnak in a liam tikah, sualnak he a thimi a si ahcun, a thiang mi Vancung luh khawhnak caah tling tein thianh a herh. Mah hmun kha Bupi nih thianhnak hmun (Purgatory) tiah a ti. Catholic Bupi cawnpiaknak (Catechism) nih: “Pathian vel le hawikomhnak in a thimi vialte, asinain tling loin thianh a si rihmi hna (sualhme)cu zungzal khamhnak an hmu taktak ko. Sihmanhsehlaw an thih hnu ah vancung ramnuam luh khawhnak ding caah a herhmi thianhlimnak an hmuh khawhnak hnga thianhnak ah thianh ta an herh. Bupi nih a donghnak thianhnak hmun a timi cu Purgatory tiah a ti. Cu hmun cu chiatserhmi hna dantatnak (Hell) timi he aa dang.” (#1030–31a) tiah a ti.

Nihin ah, Pathian nih mithiang mi siter an duh timi kha ruat ṭhan. Sualnak kip in thianh a simi dirhmun ah a thimi tlawmte hna lakah na tel ve a si ahcun, vawlei cung hrimhrim ah   thianh na si cang ti kha zum ko. Sihmanhsehlaw, nangmah asiloah na dawtmi hna thih caan ah sualnak he pehtlaihnak hmete a ngeimi tampi lakah nai tel ve rih a si ahcun, thianhpiak dih na si rih lo, asinain vancung ram nuam a phan kho ding na si kha zum ko. Thianh dih na si tikah na co te hnga ding mi vancung ramnuam kha i ruahchan law Pathian duh ning zulh in Pathian he pehtlaihnak ngei zungzal ko.