TLANGCUNG CAWNPIAKNAK

All Saints Day reflection November 1, 2024 (Matt 5:1-12a)

Nihin thawngṭha kan relmi cu tlangcung cawnpiaknak a si (Matt 5:1-12a). Tawitein thlarau thazang i lak ṭi hna u sih. “Pathian duhnak tuah kha nan duhnak nganbik a chiahmi cu lunglawmmi nan va si dah! Pathian nih an kamhmi hna kha nan co lai”(5:6).

Cawnpiaknak a palinak nih Jesuh chimmi “Dinnak” kong fiang tein a kan hngalhter. Hlanlio Judah mi hna phungah, dinnak timi cu “pehtlaihnak dik ser ṭhan” tiin cohlan a si. Miding timi hna cu Pathian le pawngkam a ummi hna kar lakah a hmaanmi pehtlaihnak a ngeimi hna kha an si. Nangteh Pathian le pawngkam ummi hna he a dik hmaanmi pehtlaihnak na ngei kho cang maw?

Cawnpiaknak apa sarihnak nih Pathian fa ka si (Khrihfa ka si) tiah aa timi hna paohpaoh kha remnak caah rianṭuantu siding in  a kan cawnpiak. Ruahnak aa khat lomi a ngeimi hna karlak ah buainak a chuah zungzal tawn. Tluknak lei a panh cuah mi vawlei ah, buainak kha zeirel loin umnak, a ṭhawngmi nih thazaang hmang in hrocernak le hremnak timi hna kha a chuahter tawn. Pathian pennak ahcun a buaimi hna kar remnak kha a umter i hmunkhat teah khuasak ṭinak, a fekmi pehtlaihnak kha a um ter. 

I remnak le a fekmi pehtlaihnak ah “Daihnak” a um. “Mi le mi karah remnak a sertu cu lunglawmmi nan va si dah!  Pathian nih ‘ka fa’ tiah an ti hna lai”(5:9). Cubantuk mi hna nih cun an tuahsernak ah Pathian sining kha an langhter khawh zungzal ko lai. Pathian cu daihnak Pathian a si (Thesalon 5:23). Rianṭuannak hmun ah siseh, innchungkhar ah siseh, vawlei pi ah siseh, daihnak ser kan i zuam tik paoh ah Pathian fa le kan si ti kha i theih zungzal ding a si.