Oct 31, Nilini Ruahawk
Reflection for Thursday October 31, 2024 (Luke 13:31-35)
Nihin Thawngṭha ah, Farasi mi tlawmpal cu Jesuh sin an kal i “Herod nih thah an duh caah hika hin na chuah a hau” tiah an chimh. Hi Farasi mi hna hi a thli tein Jesuh zultu an si ve hnga maw? Lenglei in cun Jesuh himnak hnga caah tiin an chimh taktak ko. Jesuh nih a lehmi hna cu “Va kal u law, cu cenghngia cu, ‘Nihin le thaizing ah khuachia kha ka ṭhawl hna lai i damnak kha ka tuah lai, cun a nithum ni ah ka rian cu ka lim lai’ a ti, tiah va chim u” tiah a ti hna.
Jesuh nih Farasi mi hna an khuaruah mi le tinhmi, cun Herod nih a tinhmi vialte kha a theih cia cang ko. Jesuh cu Farasi mi hna caah dawnkhantu bantuk a si caah Jerusalem khan chuahter an duhmi zong a si kho. “Maw Jerusalem, Jerusalem, profet kha na thah hna i Pathian nih na sinah lamkaltu a rak thlahmi kha lung in na rak cheh hna. Arpi nih a fale cu a thla tangah a huh hna bantukin voi zeizat te dik na chungmi cu ka kut in huh kan timh hna i na duh lo” tiah Jesuh nih a bia a ngaitu hna kha a ti hna.
Jesuh nih Farasi pawl cu amah lei ah an ṭang lo ti kha a hngalh ti cu a fiang ko. Farasi pawl lung chung zongah, Herod nih Jesuh kha a kan hloh piak lai timi ruahchannak zong an ngei kho. Mah hnu ah “hihi kan chimh, nangmah nih, ‘Bawipa min in a rami cu a cungah thluachuahnak um ko seh,’ na ti caan a phak hlan cu na ka hmu ti lai lo” tiah a ti hna.
Sihmanhsehlaw Pathian nih a timhcia mi ni le caan cu minung nih kham khawh a si lo. Farasi pawl zong nih an kham kho lo. Jesuh nih dawtnak in a kan kawh zungzal ko. Mi ṭha hna cu mi ṭhalo hna caah hling bantuk lawng si loin, nawlngeihnak le mipi cung uk duhnak an ngeihmi hna cungah dawnkhantu bantuk an si zungzal ko.
Nihin ah Jesuh nih hi dawtnak bia hi a kan chimh. Arpi nih a fale kha a thla tangah a huh hna bantukin, amah sinah, a lungthin he naih tein pumh a kan duh. Sihmanhsehlaw, kanmah le kanmah bia kan i hal a herh. Jesuh nih amah sinah a ka pumh khawhnak ding caah ka sianh lai maw? Asiloah Jesuh he aa hlatnak ah maw ka um?