Mi tlawmte lawng maw khamh asi lai?

Nihin Thawng`ha ah mibu chungin mi pakhat nih Jesuh sinah “thimmi tlawm te lawng maw khamh an si lai” timi biahalnak in aa thawk kha kan hmuh khawh. Thil sining phundang tein vun ruat cio hna u sih law, “Phungchimtu hna nih khamh na si cang” timi bia nih biatak khamh sinak ah an panh ter taktak maw? Asiloah, nangmah le nangmah bia i hal hmanh. “Khamh ka si taktak cang maw?”  Asiloah lungrethei in na um rih maw?

Hi vawlei ah hin ahohmanh a tling cikcek mi minung kan um lo. Sihmanhsehlaw Pathian nih caan a kan pek peng ko. I ngaihchih nak caan a kan pek peng ko. Kan caan ttha hna kha kan hman thiam a herh. Jesuh lawnglawng hi, hi vawlei cung a rak nung vialte lak ah dawtnak a ngei bikmi, ngaihthiamnak lungthin a ngei bikmi a si. Jesuh nih kan derthawmnak kha ttha tein a hngalh. Jesuh nih a kan dawt peng! “Inn ah ra u” tiah a kan sawm zungzal ko.

Jesuh nih “kan tling cikcek lai” tiin a kan ruat lo. Kan zang dernak a hngalh. Kan sining tein “kan tlin lo ning tein” a sinah ra hna seh ti tu kha a kan duh. Jesuh nih a kan dawtnak hi na zum maw? Pathian Fapa Jesuh nih a kan hngah dih cikcek ko! Nihin Amah kha kan sin rat ding in na lungthin innka na hunpiak laimaw? Cutin na tuah a si ahcun laksawng nganpi na hmu ko lai!