REMNAK SILOIN HUATNAK

Reflection for Thursday 24, October 2024 (Luke 12:49-53)

Nihin Thawngṭha ah Jesuh nih, “Vawlei hi mei in duah awkah pei ka rat cu, alh hluahmah cang seh law ka hei duh dah!” tiah a ti.  “Tipil in awk pakhat ka ngei i cucu a dih hlanah cun ka lungre a va thei dah” tiin a zultu hna sinah a ti hna. Cun “Vawlei cungah hin remnak tlunter awkah a ra tiah dahra nan ka ruah? Remnak si loin ṭhennak tu tlunter awkah ka ra” tiah a ti rih. Cu hnuah dawtmi hna nih pakhat le pakhat an i dohnak kong, chungkhar chung hmanh ah ṭhencheunak chuahpi awk a ratnak kong kha a zultu hna sinah fiang tein a chimh hna. Mah nih minung kan nun ning le kan sining ah a harmi thil sining he aa lomi tukforhnak hna kha zuamnak in tei ding an si timi kha a langhter.

Nihin vawlei ah, ṭhencheunak le buainak cu  chungkhar tiang in hmunkip ah hmuh khawh a si. Hi thil sining hna hi minung hna kan caah a hartuk hringhran mi a si tiah kan ruah men lai. Sihmanhsehlaw, harsatnak hna cu kan nunnak ah a ummi an si ti kha Jesuh bia nih (nihin thawngṭhabia) a kan hngalhter ṭhan. Jesuh nih a chimmi bia hna hi kan caah ṭihphannak a chuahter tu si loin midang hna caah daihnak, dawtnak le pakhat le pakhat cungah i upat thiamnak a chuahpitu si awk ah a kan cawnpiak mi a si tiin ruah ding a si.

Pathian nih dawtnak in a sermi minung kan si bangin “mi vialte nih upatnak an hmuhnak ram le vawlei kha ruat hmanh!” Pathian sermi minung sining ah aa tel cio mi kan si ko nain, tuahsernak le bia ṭha loin pakhat le pakhat fahnak kan i pe tawn. Nihin ah, na harsatnak a hmu bal mi pakhatkhat, asiloah na lung a fahter bal mi pakhatkhat kha ruat ṭhan law ngaihthiamnak lungthin in “kan cohlan ṭhan ko” tiin ruat hmanh. Hi ruahnak kha na thinlung chungah hmanthlak bangin i chiah peng law na cungah daihnak le ngaihthiam khawhnak, intuar khawhnak hna kha na ngei kho ko lai.