Timhcia tein hngah ding

Luka 12:39-48 (Wednesday)

Nihin ah Jesuh nih a zultu hna a cawnpiak hna nak a pehzulh kha kan hmuh khawh rih. Jesuh cawnpiaknak hi a fawi ngai mi te khi a lo ko. A zultu hna kha “timhcia tein um zungzal u” tiah a ti hna. Timhcia tein hngah ding timi cu “Mi Fapa” a rat lai caan kha a si. Jesuh nih an i ruahchan lo caan ah a ra lai tiah a ti hna! Cucaah, ralring tein le lungsau tein um le hngah kha a herh. Jesuh nih nihin zongah “timhcia tein um u” tiah a kan tit than. Jesuh cu zeibantuk phungsan in le zeitik ah a rat lai ti kha kan hngal kho lo.

 Nihin ni caan zongah kan sinah a ra kho mi a si. Hi zumhnak ngeih mi (a rat tthan lai nak) nih na nunnak ah thlennak a chuahpi cang maw? Nihin tonmi minung hna sin ah siseh, pawngkam thil sining cang hna cungah siseh Jesuh kan hmu kho maw? Asiloah a hlan nun bantuk tein maw“kan rian kan ṭuan” ko lai? A taktak tiah ahcun Jesuh cu nifatin kan sinah a ra ko. Jesuh ka sin a rat hi caankhat ca te lawng a si lo.

 Harsatnak le fah nak hna cu kan sin ah a um zungzal ko lai. Jesuh kan sin ah a um ko timi kha philh lo ding a si. Jesuh a rat lai caan kan hngalh lo caah mah duh mi rian lawng tuah in Jesuh kha kan philh sual maw? Asiloah amah hngalh awkah mit, asiloah lungthin kan ngei maw? Jesuh kan sin a rat kha hmuh thiam loin duhfahnak nih kan mit a hup/phenh sual maw? Jesuh cu kan sinah muisam phung tling in a ra lengmang ko. Jesuh kan sin a rat tik ah Amah a si kha kan hngal kho taktak lai maw?