RAWL CHIAHNAK INN
Luke 12:13-21 (Monday)
Nihin thawngttha bia zong ah Jesuh nih mirum pa tuanbia kha mibu pi sinah a chimh hna. Mah mirum pa nih rawl tampi a chuahter tawnmi lo tampi a ngeih. Hi kum chung thlaici nih rawl tampi a chuahpi caah mipa nih a vuimi rawl chiahnak ding caah a rawl chiahnak rawlruk a ngei lo. A donghnak ah, mirum pa nih a rawl chiahnak inn pawl kha hrawh dingin bia a khiah (a tamnak kha zoh) i a ngan deuhmi rawl chiahnak inn pawl sak ding in bia aa tim. Mah nih a rawl caah hmun a pek lawng si loin a thilri tampi chiahnak ding hmun zong a ngei lai. Hi chawva khonnak nih hin kum tampi chung ei din le nuam tein um khawhnak a pek lai.
Nunnak ṭha, a nuam ngaimi nun in a um kho tiah na ruat ve ko lo maw? A taktak ahcun mi tampi nih nunnak ṭha an hmuh khawhnak hnga fakpiin rian an ṭuan. Sihmanhsehlaw, Pathian nih hi pa cu hitin a ti: “Mihrut! Tuzan hrimhrim ah na nunnak cu an in hal lai. Cun fakpiin na rak i zuammi thil vialte cu midang ta an si dih lai.” Cun Jesuh nih hitin a chimchap: “Cuticun amah ca i vawlei chawva aa khonmi, cun Pathian caah a biapimi thil ah a rum lomi caah cun a si lai.”
Nihin vawlei ah chawva, ngeihchiah le dirhmun i khon dingin a kip in tukforhnak kan tong tawn. Nihin ah Jesuh nih kan thih tikah kan rumnak, kan ngeihchiah le kan dirhmun nih zeihmanh a khamhnak a kan pe kho lai lo ti kha a kan theihter. Biaceih kan si dingmi cu ‘Pathian nih a kan pekmi rumnak kha ka khong maw? A rian thiang kan ṭuan maw ṭuan lo timi kha a si ko. Nihin hi kanmah le kanmah i purhdah in i hal awk ni ṭha a si kho men: “Ka nunnak ah zeibantuk thil kha le ahodah a biapibik mi an si? Phaisa, dirhmun, thilri, upatnak maw a si? Asiloah ka dawtmi hna maw, asiloah pumpak herhmi thil tampi dah? Dawtnak, ka zohkhenh mi hna le pekchanhnak ka tuahmi hna in vawlei ah thlennak tuah ka zuam maw? Pathian nih a ka pekmi laksawng tampi hi zalong tein midang hna kha ka hrawm ve hna maw?
Nihin le nifa tein vancung kan kalnak lam kan i cawh cuahmah ko. Nihin ah kan i thimmi lam in kan ser dingmi vancung phanhnak lam cu zeidah a si? Jesuh nih kan kalnak lam hi a cohlang lai maw?